پیٹرول و ڈیزل کی قیمتوں میں اضافے کا امکان

پاکستان میں پیٹرول و ڈیزل کی قیمتوں میں اضافے کا امکان ہے، پیٹرولیم مصنوعات کی قیمت میں تین سے پانچ روپے فی لٹر اضافے کا خدشہ ہے۔

نجی ٹی وی کے مطابق عالمی مارکیٹ میں خام تیل کی قیمتوں میں اضافہ ہو گیا ہے، قیمتیں تین ماہ کی بلند ترین سطح پر پہنچ گئی ہیں۔

برینٹ کروڈ فیوچر کی قیمت میں 0 اعشاریہ 35 فیصد اضافے کے ساتھ 77 اعشاریہ 32 ڈالر فی بیرل کی سطح پر پہنچ چکی ہے، یہ مسلسل تیسری بار ہفتہ وار اضافہ ہے۔

عالمی مارکیٹ میں تیل کی قیمتوں کو مدنظر رکھتے ہوئے پاکستان میں بھی پیٹرولیم مصنوعات کی قیمتوں میں اضافے کا امکان ہے۔

حکومت کی جانب سے یکم جنوری کو بھی پیٹرولیم مصنوعات کی قیمتوں میں اضافہ کیا گیا تھا، پیٹرول کی قیمت 0 اعشاریہ 56 جبکہ ہائی اسپیڈ ڈیزل کی قیمت 2 اعشاریہ 96 روپے بڑھی تھی۔