عید الاضحیٰ؛ جہلم میں فوجی مل گراؤنڈ میں عارضی مویشی منڈی قائم
جہلم: عید الاضحی کی آمد کے پیش نظر ضلعی انتظامیہ نے جہلم برلب جی ٹی روڈ واقع فوجی مل گراؤنڈ میں عارضی مویشی منڈی قائم کر دی ہے، جہاں قربانی کے جانوروں کی خرید و فروخت کے لیے سیل پوائنٹ بھی قائم کیا گیا ہے۔
ضلعی انتظامیہ کی جانب سے قائم کی گئی اس مویشی منڈی میں محکمہ لائیوسٹاک کی طرف سے جانوروں کی صحت و معائنے کے لیے خصوصی کیمپ بھی لگا دیا گیا ہے تاکہ شہری صحت مند اور محفوظ جانور خرید سکیں۔ گرمی کی شدت کے باعث بیوپاریوں نے اپنی مدد آپ کے تحت جانوروں کے لیے سایہ دار جگہیں اور خریداروں کے لیے ٹھنڈے پانی کا انتظام بھی کر رکھا ہے۔
انتظامیہ کی جانب سے جاری کردہ حکم نامے کے مطابق بیوپاریوں کو صرف مختص کردہ مقام یعنی فوجی مل گراؤنڈ میں ہی جانور فروخت کرنے کی اجازت دی گئی ہے جبکہ شہر کے اندر گلی محلوں، چوکوں اور دیگر عوامی مقامات پر جانوروں کی خرید و فروخت پر سختی سے پابندی عائد ہے۔ خلاف ورزی کی صورت میں سخت کارروائی کی جائے گی۔
تاہم ضلعی انتظامیہ کی جانب سے جاری احکامات کے باوجود اندرون شہر درجنوں مقامات پر غیرقانونی اور خودساختہ مویشی منڈیاں قائم ہو چکی ہیں، جن میں باغ محلہ، شمالی محلہ، بلال ٹاؤن، چونترہ، کھرالہ، کالا گجران، اور روہتاس روڈ سمیت متعدد علاقے شامل ہیں۔ یہ صورتحال ضلعی انتظامیہ اور اُس کے سپیشل سکواڈ کی کارکردگی پر سوالیہ نشان اٹھا رہی ہے۔
شہریوں نے ڈپٹی کمشنر جہلم سے مطالبہ کیا ہے کہ اندرون شہر قائم ان غیرقانونی منڈیوں کے خلاف فوری کارروائی کی جائے تاکہ شہر کا ماحول صاف ستھرا رہے اور گندگی و تعفن سے نجات حاصل ہو سکے۔
