جہلم میں نامعلوم افراد نے 50 سالہ شخص کو گلا دبا کر قتل کردیا

جہلم میں نامعلوم افراد نے 50 سالہ شخص کو گلا دبا کر قتل کردیا گیا، لاش کو ہسپتال منتقل کر دیا گیا۔

تفصیلات کے مطابق جہلم کے علاقہ حسن آباد میں 50 سالہ ارشد محمود ولد محمد بشیر احمد کو نامعلوم افراد نے گلا دبا کر قتل کر دیا۔ پولیس نے لاش کو تحویل میں لے کر ڈسٹرکٹ ہیڈ کوارٹر ہسپتال جہلم منتقل کردیا۔

پولیس کا کہنا ہے کہ مقتول کے منہ میں تولیہ بھی دھنسا ہوا تھا، مقتول ارشد کی سانس بند ہونے سے ہلاکت ہوئی۔ مقتول ارشد محمودکی بیوی سے علیحدگی ہوچکی ہے اور گھر میں اکیلا ہی رہائش پذیر تھا۔

پولیس کا یہ بھی کہنا ہے کہ مقتول ارشد کے ہمسائے میں رہنے والے بھائی نے دو نوجوان لڑکوں کو دیواریں پھلانگ کر بھاگتے بھی دیکھا ہے۔ مقتول کے گلے میں زخموں کے نشانات موجود ہیں۔ کرائم سین یونٹ کی مدد سے شواہد اکھٹے کر کے تحقیقات شروع کردی گئی ہیں۔

تھانہ کالا گجراں پولیس نے نامعلوم ملزمان کے خلاف مقدمہ درج کر لیا۔