جہلم پولیس کی بروقت کارروائی، پتنگیں رکھنے والا ملزم گرفتار، پتنگیں برآمد
8
جہلم پولیس نے پتنگ بازی اور پتنگ فروشی کے خلاف جاری کریک ڈاؤن کے دوران ایک اور اہم کارروائی کرتے ہوئے پتنگیں رکھنے والے ملزم کو گرفتار کر لیا۔ یہ کارروائی ایس ایچ او تھانہ کالا گجراں کی سربراہی میں عمل میں لائی گئی، جس کے دوران ملزم کے قبضے سے بڑی تعداد میں پتنگیں برآمد کی گئیں۔
تفصیلات کے مطابق پولیس کو خفیہ اطلاع موصول ہوئی کہ تھانہ کالا گجراں کے علاقہ میں ایک شخص غیر قانونی طور پر پتنگیں رکھے ہوئے ہے، جس پر فوری کارروائی کرتے ہوئے پولیس ٹیم نے چھاپہ مارا اور ملزم کو موقع سے گرفتار کر لیا۔ تلاشی کے دوران ملزم کے قبضے سے 50 عدد پتنگیں برآمد ہوئیں، جو حکومتِ پنجاب کی جانب سے عائد کردہ پابندی کی صریح خلاف ورزی ہیں۔
پولیس کا کہنا ہے کہ ملزم نے پتنگیں اپنے پاس رکھ کر قانون کی خلاف ورزی کی، جس پر اس کے خلاف تھانہ کالا گجراں میں باقاعدہ مقدمہ درج کر لیا گیا ہے اور مزید قانونی کارروائی جاری ہے۔ پولیس حکام کے مطابق پتنگ بازی نہ صرف قانوناً جرم ہے بلکہ اس کے نتیجے میں شہریوں کی جان و مال کو شدید خطرات لاحق ہوتے ہیں، جس کے باعث اس مکروہ دھندے میں ملوث عناصر کے خلاف سخت اقدامات کیے جا رہے ہیں۔
ڈسٹرکٹ پولیس آفیسر جہلم طارق عزیز سندھو نے اس کارروائی پر پولیس ٹیم کی کارکردگی کو سراہتے ہوئے کہا کہ پتنگ فروشی، پتنگ بازی اور شہریوں کی جان و مال کو نقصان پہنچانے والے عناصر کے ساتھ کسی قسم کی رعایت نہیں برتی جائے گی۔ انہوں نے واضح کیا کہ ایسے افراد کے خلاف بلا امتیاز اور سخت قانونی کارروائی عمل میں لائی جائے گی۔
ڈی پی او جہلم کا مزید کہنا تھا کہ شہریوں کے تحفظ کو یقینی بنانے کے لیے ضلع بھر میں پتنگ بازی کے خلاف بھرپور کریک ڈاؤن جاری رہے گا، اور عوام سے بھی اپیل کی جاتی ہے کہ وہ ایسے عناصر کی نشاندہی کر کے پولیس کے ساتھ تعاون کریں تاکہ کسی بھی ناخوشگوار واقعے سے بچا جا سکے۔
