پنڈدادنخان میں باؤلے کتے کے کاٹنے سے میٹرک کا طالب علم جاں بحق
پنڈدادنخان کے نواحی علاقے میں باؤلے کتے کے کاٹنے سے میٹرک کا طالب علم جاں بحق ہو گیا۔
تفصیلات کے مطابق جہلم کی تحصیل پنڈدادنخان کے نواحی علاقے جلالپور شریف میں افسوسناک واقعہ، دھریالہ جالپ کا رہائشی میٹرک کا طالب علم محمد ابرار باؤلے کتے کے کاٹنے سے جاں بحق ہو گیا۔
ذرائع کے مطابق تقریباً ایک ماہ قبل مرحوم کو کتے نے کاٹا تھا، تاہم علاج معالجے کے مناسب انتظامات نہ ہونے کی وجہ سے اس کی حالت بگڑ گئی۔ گزشتہ رات طبیعت خراب ہونے پر راولپنڈی ہسپتال منتقل کیا جا رہا تھا، مگر للِہ انٹرچینج کے قریب حالت مزید بگڑنے پر اسے مریم نواز ہیلتھ کلینک للِہ لایا گیا جہاں وہ جانبر نہ ہو سکا۔
علاقہ مکینوں نے اس افسوسناک واقعے پر شدید دکھ اور غم کا اظہار کرتے ہوئے کہا کہ ضلعی محکمہ صحت کی جانب سے ریبیز ویکسین کی عدم دستیابی اور عوامی سطح پر آگاہی کی کمی کے باعث اس طرح کے واقعات پیش آ رہے ہیں۔
شہریوں نے مطالبہ کیا ہے کہ محکمہ صحت فوری طور پر تحصیل پنڈدادنخان اور گردونواح کے تمام مراکزِ صحت میں ریبیز ویکسین کی دستیابی یقینی بنائے تاکہ مستقبل میں کسی قیمتی جان کا ضیاع نہ ہو۔
