دینہ کے مدرسے میں کئی طلباء سے بدفعلی کا انکشاف، درندہ صفت معلم گرفتار

دینہ کے مدرسے میں زیر تعلیم کئی طلباء سے استاد کی مبینہ بدفعلی کا انکشاف سامنے آیا ، پولیس نےمقدمہ درج کرکے ملزم کو گرفتار کر لیا، ڈی پی او جہلم کا نوٹس، ڈی ایس پی سے رپورٹ طلب کر لی۔

تفصیلات کے مطابق جہلم کی تحصیل دینہ کے جامعہ دارالقرآن پیپل والی گلی مین بازار دینہ میں زیر تعلیم کئی طلباء کے ساتھ مبینہ بدفعلی کا ہولناک واقعہ سامنے آیا ہے۔

دینہ میں مدرسے کے بچوں سے مبینہ زیادتی کا معاملہ، دوسرا رخ بھی سامنے آ گیا؛ ویڈیو

دس طالب علموں سے زیادتی کا مقدمہ مدرسے کے معلم محمد عمران ضیاء قریشی کے خلاف درج کر لیا گیا، مقدمہ 14سالہ طالب علم کے والد کی درخواست پر تھانہ دینہ میں درج کیا گیا ہے۔

متاثرہ طالب علموں کی عمریں 12 سے 18سال کے درمیان ہیں۔ طالب علموں کو گزشتہ کئی ماہ سے ملزم قاری عمران ضیاء قریشی بدفعلی کا نشانہ بنارہا تھا۔

ملزم قاری عمران ضیاء قریشی رمضان المبارک کے بابرکت مہینے میں روزہ کی حالت میں طالب علموں کو بدفعلی کا نشانہ بناتا رہا، ملزم مدرسہ سے ملحقہ کمرے میں لے جا کر طالب علموں کو بدفعلی کا نشانہ بناتا تھا اور یہ سلسلہ کئی روز سے جاری تھا۔

واقعہ کی اطلاع ملتے ہی دینہ پولیس نے ایکشن لیتے ہوئے مقدمہ درج کرکے ملزم کو فوری گرفتار کر لیا۔

ڈسٹرکٹ پولیس آفیسر جہلم ناصر محمود باجوہ نے دینہ شہر میں بچوں کے ساتھ پیش آنے والے افسوسناک واقعہ کا نوٹس لیتے ہوئے ڈی ایس پی صدر سرکل سے رپورٹ طلب کر لی۔

ترجمان جہلم پولیس نے بتایا کہ ملزم کی تفتیش کے لئے سینئر افسران پرمشتمل ٹیم تشکیل دے دی گئی ہے، یقینی بنایا جائے گا کہ ملزم کو ٹھوس شواہد کے ساتھ چالان عدالت کیا جائے۔