جہلم: وزیراعلیٰ پنجاب مریم نواز شریف کے ویژن اور ڈیجیٹل لٹریسی پروگرام کے تحت ضلع جہلم میں ایک اور سنگِ میل عبور کر لیا گیا۔
حکومت پنجاب نے لٹریسی اور نان فارمل بیسک ایجوکیشن کے تحت مڈل اور ٹیکنیکل اسکولز کا آغاز کر دیا ہے، جن کا مقصد ایسے بچے اور بچیاں ہیں جو کسی وجہ سے پرائمری کے بعد باقاعدہ تعلیم جاری نہیں رکھ پاتے۔
ابتدائی مرحلے میں ضلع جہلم کے مختلف علاقوں میں 10 ایلیمنٹری اسکولز قائم کیے گئے ہیں، جہاں 200 سے زائد طلباء و طالبات کو ششم تا ہشتم تک تعلیم فراہم کرنے کے ساتھ ساتھ بیوٹیفکیشن، سلائی اور دیگر ہنر بھی سکھائے جائیں گے تاکہ وہ عملی زندگی میں باعزت روزگار حاصل کر سکیں۔
یونین کونسلز للہ، پیر کھارا، ڈھوک صادق، پیل بنے خاں، منڈی صدیق، کوہالی، مونن اور نئی آبادی دینہ میں یہ اسکول قائم کیے گئے ہیں۔
اس موقع پر ایڈیشنل ڈپٹی کمشنر جنرل صبا سحر اور ڈسٹرکٹ ایجوکیشن آفیسر لٹریسی میمونہ انجم نے منتخب اساتذہ کو تقرری کے آرڈرز اور ٹیبلٹس تقسیم کیے۔
تقریب سے خطاب کرتے ہوئے افسران نے کہا کہ یہ اقدام نہ صرف بچوں کو زیورِ تعلیم سے آراستہ کرے گا بلکہ انہیں ہنر مند بنا کر ایک روشن مستقبل کی ضمانت بھی بنے گا۔
-
-
-
-
