سوہاوہ: شادی سے ایک روز قبل نوجوان فزیو تھراپسٹ مبینہ طور پر لاپتا ہو گیا، پولیس نے اغوا کا مقدمہ درج کر لیا۔
ذرائع کے مطابق جہلم کی تحصیل سوہاوہ میں شادی سے ایک روز قبل 26 سالہ فزیو تھراپسٹ ڈاکٹر محمد حارث کے مبینہ طور پر اغوا ہونے کا معاملہ سامنے آیا ہے۔ پولیس کے مطابق ڈاکٹر حارث کے مبینہ اغوا کا مقدمہ نامعلوم افراد کے خلاف درج کرلیا گیا ہے، جبکہ اس کی تلاش کے لیے کارروائیاں جاری ہیں۔
ذرائع کے مطابق ڈاکٹر محمد حارث کی شادی طے تھی اور آج شام مہندی کی تقریب منعقد ہونا تھی۔ ڈاکٹر حارث گھر سے مریض دیکھنے کے لیے نکلا اور اپنے ہمراہ لیپ ٹاپ بھی لے گیا، تاہم بعد ازاں اس کا کوئی رابطہ نہیں ہوسکا۔
پولیس کے مطابق ڈاکٹر حارث اور خاتون ڈاکٹر (ل) کا رشتہ دونوں خاندانوں کی رضامندی سے طے ہوا تھا۔ تاہم مبینہ طور پر ڈاکٹر حارث نے اپنی ہونے والی دلہن کو واٹس ایپ پیغام کے ذریعے شادی سے انکار کرتے ہوئے کہا کہ وہ شادی نہیں کرسکتا اور اپنی مرضی سے ہمیشہ کے لیے جارہا ہے۔
مبینہ واٹس ایپ پیغام میں ڈاکٹر حارث نے اپنی ہونے والی دلہن سے کہا کہ وہ اس سے شادی نہیں کرسکتا اور نہیں چاہتا کہ اس کی وجہ سے اس کی زندگی خراب ہو۔
پولیس کا کہنا ہے کہ ڈاکٹر محمد حارث کی تلاش کے لیے جدید تفتیشی طریقہ کار اور دستیاب وسائل بروئے کار لائے جا رہے ہیں، جبکہ پولیس حکام نے امید ظاہر کی ہے کہ اسے جلد تلاش کرلیا جائے گا۔
پولیس کے مطابق واقعے کے تمام پہلوؤں کا جائزہ لیا جا رہا ہے اور ڈاکٹر حارث کے لاپتا ہونے کی اصل وجوہات مزید تفتیش کے بعد سامنے آئیں گی۔
