نگہبان رمضان کارڈز کی حقداروں کی دہلیز تک فراہمی تیزی سے جاری، ضلعی انتظامیہ متحرک

دینہ: وزیر اعلیٰ پنجاب مریم نواز شریف کے وژن اور ڈپٹی کمشنر جہلم میر رضا اوزگن کی ہدایت پر ضلع جہلم بھر میں نگہبان رمضان کارڈز کی مستحق افراد تک گھر گھر فراہمی کا عمل تیزی سے جاری ہے۔

اسسٹنٹ کمشنرز کی براہِ راست نگرانی میں PSER کی ٹیمیں شفاف طریقۂ کار کے تحت فیلڈ میں متحرک ہیں تاکہ رمضان المبارک سے قبل مستحق خاندانوں کو بروقت ریلیف فراہم کیا جا سکے۔

ضلعی انتظامیہ کے مطابق تمام تحصیلوں میں کارڈز کی تقسیم کے عمل کی سخت مانیٹرنگ کی جا رہی ہے تاکہ کوئی بھی حقدار اس سہولت سے محروم نہ رہ جائے۔ ٹیمیں موبائل ایپ کے ذریعے مستحقین کے ڈیٹا کی تصدیق کے بعد موقع پر ہی نگہبان رمضان کارڈز حوالے کر رہی ہیں، جس سے شفافیت اور رفتار دونوں کو یقینی بنایا جا رہا ہے۔

انتظامیہ کا کہنا ہے کہ نگہبان رمضان کارڈز کی تقسیم کا بنیادی مقصد غریب اور متوسط طبقے کو مہنگائی کے اثرات سے بچانا اور انہیں ماہِ صیام کے دوران اشیائے ضروریہ کی خریداری میں سہولت فراہم کرنا ہے۔ اس اقدام کے ذریعے ہزاروں خاندانوں کو براہِ راست ریلیف پہنچایا جا رہا ہے۔

ڈپٹی کمشنر جہلم کی جانب سے فیلڈ عملے کو ہدایت کی گئی ہے کہ وہ عوام کے ساتھ خوش اخلاقی سے پیش آئیں اور کارڈز کی تقسیم کے عمل کو جلد از جلد مکمل کریں۔ ضلعی انتظامیہ نے اس عزم کا اظہار کیا ہے کہ وزیر اعلیٰ پنجاب کے اس فلاحی منصوبے کو ہر صورت کامیاب بنایا جائے گا تاکہ مستحقین رمضان المبارک کی برکتوں سے بھرپور فائدہ اٹھا سکیں۔