جہلم میں ٹک ٹاک ویڈیو بنانے کا شوق نوجوان کی جان لے گیا

سوہاوہ/جہلم: سوہاوہ میں ٹک ٹاک ویڈیو بنانے کا شوق نوجوان کی جان لے گیا، لاش کو ہسپتال منتقل کر دیا گیا۔

تفصیلات کے مطابق یہ افسوسناک واقعہ جہلم کی تحصیل سوہاوہ میں سوہاوہ ریلوے اسٹیشن کے قریب پیش آیا، جہاں کراچی سے تعلق رکھنے والا نوجوان ٹک ٹاک ویڈیو بناتے ہوئے چلتی ٹرین سے گر کر جاں بحق ہوگیا۔

ریلوے ذرائع کے مطابق حادثہ ہزارہ ایکسپریس میں پیش آیا جو حویلیاں سے کراچی جا رہی تھی۔ نوجوان جس کی شناخت عبدالرحمٰن کے نام سے ہوئی ہے ویڈیو بناتے ہوئے ٹرین کے دروازے پر کھڑا تھا کہ اچانک توازن کھو بیٹھا اور ٹرین سے نیچے گر گیا۔

ریسکیو حکام نے موقع پر پہنچ کر نوجوان کو فوری طبی امداد دینے کی کوشش کی، تاہم وہ زخموں کی تاب نہ لاتے ہوئے موقع پر ہی دم توڑ گیا۔ ریسکیو ٹیم نے نوجوان کی لاش کو تحصیل ہیڈ کوارٹر ہسپتال سوہاوہ منتقل کر دیا۔