جہلم میں ناخلف بیٹے نے باپ کو بیلچے سے تشدد کا نشانہ بناڈالا

جہلم میں بیٹے نے باپ کو بیلچے سے تشدد کا نشانہ بناڈالا، باپ کو شدید زخمی حالت میں ہسپتال منتقل کر دیا گیا۔

تفصیلات کے مطابق جہلم میں تھانہ صدر کے علاقہ میں بیٹے نے اپنے 55 سالہ والد اور بھائی کو بیلچے اور سریے کے وار کر کے شدید زخمی کر دیا۔ واقعہ چک حافظہ نزد گورنمنٹ ٹیکنیکل کالج چک دولت میں پیش آیا جہاں شکور نامی نوجوان نے اپنے والد ظہور احمد اور بھائی پر بیلچے سے حملہ کیا۔

پولیس ذرائع کے مطابق بیٹے کے اس سفاکانہ حملے کی وجہ اس کا بری عادتوں سے باز نہ آنا اور باپ کی جانب سے روک ٹوک بتائی جا رہی ہے۔ تشدد کا نشانہ بننے والے 55 سالہ ظہور احمد کو فوری طور پر سول اسپتال جہلم منتقل کیا گیا، جہاں ان کی حالت تشویشناک بتائی گئی، تاہم پولیس کے مطابق اب ان کی حالت خطرے سے باہر ہے۔

واقعہ کی ویڈیو بھی منظر عام پر آگئی ہے، جو جہلم اپڈیٹس کو موصول ہوئی ہے۔ ویڈیو میں ملزم شکور احمد کو اپنے باپ ظہور احمد پر بے رحمی سے بیلچے کے وار کرتے دیکھا جا سکتا ہے۔

اہل علاقہ نے فوری طور پر پولیس کو اطلاع دی، جس پر پولیس موقع پر پہنچی اور زخمی کو ریسکیو کر کے اسپتال منتقل کیا۔ ملزم شکور احمد کو گرفتار کر کے اس کے خلاف مقدمہ درج کر لیا گیا ہے اور مزید تفتیش جاری ہے۔

پولیس حکام کا کہنا ہے کہ ملزم کے خلاف قانون کے مطابق کارروائی عمل میں لائی جا رہی ہے اور واقعے کی ہر پہلو سے تحقیقات کی جا رہی ہیں۔