عوامی خدمات کی بہتری اور زیرِ التوا امور کی بروقت تکمیل یقینی بنائی جائے، ڈپٹی کمشنر جہلم میر رضا اوزگن
جہلم: ضلع جہلم میں انتظامی کارکردگی، ترقیاتی اقدامات اور عوامی خدمات کی بہتری سے متعلق مختلف امور کا جائزہ لینے کے لیے ڈپٹی کمشنر جہلم میر رضا اوزگن کی زیرِ صدارت ایک اہم اجلاس منعقد ہوا۔
اجلاس میں ضلعی انتظامیہ اور متعلقہ محکموں کی کارکردگی، جاری اقدامات اور درپیش مسائل پر غور کیا گیا، جبکہ عوام کو بہتر سہولیات کی فراہمی اور انتظامی امور کی بروقت تکمیل کے لیے مؤثر اقدامات کی ضرورت پر زور دیا گیا۔
اجلاس کے دوران گرین پراپرٹی سرٹیفکیٹس، کھیوٹ اور انتقالات سے متعلق مسائل، معاشی و کاروباری ترقی، واٹر اینڈ سینیٹیشن ایجنسی (واسا)، شہر کی خوبصورتی کے اقدامات اور ستھرا پنجاب پروگرام پر ہونے والی پیش رفت کا جائزہ لیا گیا۔ متعلقہ محکموں کی جانب سے ان شعبوں میں جاری سرگرمیوں اور درپیش معاملات پر بھی تبادلہ خیال کیا گیا۔
اجلاس میں پرائس کنٹرول کے اقدامات، کلیدی کارکردگی اشاریوں (KPIs)، ریونیو کورٹ مینجمنٹ سسٹم، ای بز، وزیراعظم فیول ریلیف پروگرام اور ڈسٹرکٹ ہیڈکوارٹرز ہسپتال جہلم کی تزئین و مرمت سے متعلق امور بھی زیرِ بحث آئے۔ اس موقع پر متعلقہ محکموں کی کارکردگی اور جاری اقدامات کا جائزہ لیتے ہوئے مقررہ اہداف کے حصول اور حکومتی اقدامات پر مؤثر عملدرآمد کی اہمیت اجاگر کی گئی۔
اجلاس کے دوران ضلع بھر میں سکیورٹی انتظامات کا بھی جائزہ لیا گیا تاکہ امن و امان کی صورتِ حال اور متعلقہ انتظامی امور پر توجہ برقرار رکھی جا سکے۔
ڈپٹی کمشنر جہلم میر رضا اوزگن نے متعلقہ افسران کو ہدایت کی کہ زیرِ التوا معاملات پر پیش رفت تیز کی جائے، جاری اقدامات کی موثر نگرانی یقینی بنائی جائے اور محکموں کے درمیان رابطہ کاری کو مزید بہتر بنایا جائے۔ انہوں نے اس امر پر زور دیا کہ انتظامی امور کو مقررہ وقت میں مکمل کرنے اور عوام کو معیاری خدمات فراہم کرنے کے لیے تمام متعلقہ محکمے اپنی ذمہ داریاں مؤثر انداز میں ادا کریں۔
اجلاس میں اس بات پر بھی زور دیا گیا کہ ترقیاتی اور انتظامی اقدامات پر عملدرآمد کے دوران درپیش رکاوٹوں کو دور کیا جائے اور عوامی مفاد سے متعلق معاملات کو ترجیح دی جائے تاکہ ضلع جہلم میں انتظامی کارکردگی بہتر بنانے اور شہریوں کو سہولیات کی فراہمی کے لیے جاری کوششوں کو مؤثر بنایا جا سکے۔
