جہلم میں کھلے سگریٹ اور نسوار کی مبینہ کھلے عام فروخت، شہریوں میں تشویش
جہلم شہر سمیت ضلع بھر میں گلی محلوں کی دکانوں پر کھلے سگریٹ اور مختلف اقسام کی نسوار کی مبینہ کھلے عام فروخت پر شہریوں نے شدید تشویش کا اظہار کرتے ہوئے متعلقہ اداروں سے فوری نوٹس لینے کا مطالبہ کیا ہے۔
تفصیلات کے مطابق جہلم شہر اور ضلع کی چاروں تحصیلوں میں متعدد دکانوں پر کھلے سگریٹ اور نسوار باآسانی فروخت کی جا رہی ہے۔ شہریوں کا کہنا ہے کہ اس رجحان سے خصوصاً کم عمر بچوں اور نوجوانوں کی صحت کو سنگین خطرات لاحق ہو رہے ہیں، جبکہ تمباکو نوشی اور نشہ آور اشیاء تک آسان رسائی ان میں مضر عادات کو فروغ دے سکتی ہے۔
شہریوں کے مطابق مختلف علاقوں میں بعض اقسام کی نسوار بھی فروخت کی جا رہی ہے، جس کے بارے میں ان کا مؤقف ہے کہ اس کے مسلسل استعمال سے صحت پر منفی اثرات مرتب ہو سکتے ہیں اور منہ، گلے اور دیگر امراض کا خطرہ بڑھ سکتا ہے۔
سماجی حلقوں نے مطالبہ کیا ہے کہ تمباکو سے متعلق قوانین پر سختی سے عملدرآمد کرایا جائے، خصوصاً کم عمر افراد کو سگریٹ اور دیگر تمباکو مصنوعات کی فروخت کی روک تھام کے لیے مؤثر اقدامات کیے جائیں۔ انہوں نے کھلے سگریٹ کی فروخت کی نگرانی بڑھانے اور خلاف ورزی کرنے والوں کے خلاف قانونی کارروائی کا بھی مطالبہ کیا۔
شہریوں نے وفاقی و صوبائی حکومت، ضلعی انتظامیہ اور متعلقہ قانون نافذ کرنے والے اداروں سے اپیل کی ہے کہ کھلے سگریٹ اور نسوار کی فروخت کے حوالے سے موجود قوانین پر مؤثر عملدرآمد یقینی بنایا جائے، عوام میں تمباکو نوشی کے مضر اثرات سے متعلق آگاہی مہم چلائی جائے اور انسانی صحت کے تحفظ کے لیے ضروری اقدامات کیے جائیں۔
