جلالپور شریف نہر کنارے ڈکیتی کی دلیرانہ واردات، مسافروں سے نقدی اور موبائل فونز چھین لیے گئے
جہلم/ پنڈدادنخان: جلالپور شریف نہر کنارے ایک دلیرانہ ڈکیتی کی واردات پیش آئی جہاں تین نامعلوم مسلح افراد نے اسلحے کے زور پر آدھا گھنٹہ تک ناکہ لگا کر مسافروں کو لوٹ لیا۔
یہ واقعہ تھانہ چوٹالہ، پولیس چوکی مصری موڑ کی حدود میں شاہ کمیر کے مقام پر پیش آیا۔ عینی شاہدین کے مطابق ڈاکوؤں نے دو رکشوں، گاڑیوں اور موٹر سائیکل سوار مسافروں سے نقدی اور موبائل فونز چھین لیے۔
ایک عینی شاہد کا کہنا تھا کہ واردات میں شامل دو افراد کا قد درمیانہ جبکہ ایک کا قد لمبا تھا، تینوں نے نقاب پہن رکھے تھے۔
متاثرہ شہری کے مطابق ایک قدآور ڈاکو نے اس پر رائفل تان کر کہا، "جو کچھ ہے نکال دو”، جس پر متاثرہ شہری نے بتایا کہ وہ ایک بوڑھا آدمی ہے اور اس کے پاس صرف چار سو روپے ہیں۔ ڈاکو نے جواب دیا کہ انہیں پہلے ہی کافی رقم مل چکی ہے اور اسے خاموش بیٹھنے کا حکم دیا۔
واردات کے بعد ملزمان موٹر سائیکل پر پہلے مشرق کی جانب روانہ ہوئے، تاہم کچھ دیر بعد واپس مڑ کر مغرب کی طرف فرار ہو گئے۔ اس واقعے کے بعد علاقہ مکینوں میں خوف و ہراس پھیل گیا ہے۔
عوام نے ڈی پی او جہلم سے مطالبہ کیا ہے کہ رمضان المبارک کے دوران پولیس گشت کو مزید سخت کیا جائے اور ایسے واقعات کی روک تھام کے لیے مؤثر اقدامات کیے جائیں تاکہ شہری خود کو محفوظ محسوس کر سکیں۔
