جہلم کے تجارتی مراکز، بازروں اور چوک چوراہوں سے تجاوزات کا خاتمہ نہ ہو سکا
جہلم: وزیر اعلی پنجاب کی ہدایت کے باوجود تجاوزات کا خاتمہ نہ ہو سکا، شہریوں کو مشکلات کا سامنا ہے۔
تفصیلات کے مطابق جہلم میں وزیر اعلیٰ پنجاب مریم نواز شریف کی خصوصی ہدایت کے باوجود شہر کے تجارتی مراکز، چوک، چوراہوں اور بازاروں میں تجاوزات کا خاتمہ نہیں ہو سکا۔ تجاوزات کی بھرمار کے باعث شہریوں کو آمد و رفت میں شدید مشکلات کا سامنا ہے، اور اندرون شہر ٹریفک کا نظام بری طرح متاثر ہو چکا ہے۔
شہر کے اہم علاقوں جیسے شاندار چوک، محمدی چوک، جادہ چوک، روہتاس روڈ، سول لائن روڈ، اولڈ جی ٹی روڈ، تحصیل روڈ، ریلوے روڈ، اقبال لائبریری روڈ اور پرلنڈا وغیرہ میں تجاوزات نے شہریوں کی مشکلات میں مزید اضافہ کر دیا ہے۔ میونسپل کمیٹی کے اطراف میں تجاوزات کی وجہ سے غیر معمولی رش رہتا ہے، جس کی وجہ سے خواتین کو بھی گزرنے میں مشکلات پیش آتی ہیں۔
شہریوں کا کہنا ہے کہ تجاوزات کے خاتمے کے لیے گزشتہ تین ہفتوں سے کوئی موثر آپریشن نہیں کیا گیا۔ تجاوزات میں اضافے کی اصل وجہ میونسپل کمیٹی کے عملے کی سرپرستی ہے۔
شہریوں نے ڈپٹی کمشنر سے مطالبہ کیا ہے کہ تجاوزات کے خاتمے کے لیے فرض شناس اور ایماندار افسران کو تعینات کیا جائے تاکہ اس مسئلے کا جڑ سے خاتمہ کیا جا سکے۔
