ممکنہ سیلابی صورتحال سے نمٹنے کے لیے ہر ممکن حفاظتی اقدامات کیے جا رہے ہیں، ڈپٹی کمشنر میر رضا اوزگن
جہلم: مون سون بارشوں اور ممکنہ سیلابی صورتحال سے موثر انداز میں نمٹنے کے لیے کیے گئے انتظامات کا جائزہ لینے کے حوالے سے ڈائریکٹر جنرل پنجاب ڈیزاسٹر مینجمنٹ اتھارٹی (PDMA) عمر عباس میلہ اور ڈپٹی کمشنر جہلم میر رضا اوزگن کی مشترکہ زیر صدارت ایک اہم اجلاس منعقد ہوا، جس میں ضلعی انتظامیہ اور متعلقہ محکموں کے افسران نے شرکت کی۔
اجلاس میں ایڈیشنل ڈپٹی کمشنر (ریونیو)، ایڈیشنل ڈپٹی کمشنر (جنرل)، اسسٹنٹ کمشنرز، ریسکیو 1122، محکمہ آبپاشی، پولیس، محکمہ صحت، محکمہ مواصلات و تعمیرات، میونسپل اداروں اور دیگر متعلقہ محکموں کے افسران نے شرکت کی اور مون سون بارشوں کے دوران ممکنہ ہنگامی صورتحال سے نمٹنے کے لیے اپنی تیاریوں پر تفصیلی بریفنگ دی۔
اجلاس کے دوران نالہ گہان، نالہ بنہاں اور دیگر نشیبی علاقوں کی صورتحال، ممکنہ سیلابی خطرات، برساتی ندی نالوں کی نگرانی، منگلا ڈیم سے متعلق امور، فلڈ ریلیف کیمپس، ریسکیو آپریشنز، ہنگامی مشینری، افرادی قوت اور دستیاب وسائل کا تفصیلی جائزہ لیا گیا۔
ڈائریکٹر جنرل پی ڈی ایم اے عمر عباس میلہ نے ہدایت کی کہ نالہ گہان، نالہ بنہاں اور دیگر حساس علاقوں کی مسلسل نگرانی کو یقینی بنایا جائے، ریسکیو ٹیموں اور ہنگامی مشینری کو ہر وقت الرٹ رکھا جائے، جبکہ عوام کو بروقت آگاہی فراہم کرنے کے لیے تمام دستیاب ذرائع استعمال کیے جائیں تاکہ کسی بھی ہنگامی صورتحال میں فوری ردعمل ممکن ہو۔
اس موقع پر ڈپٹی کمشنر میر رضا اوزگن نے کہا کہ شہریوں کے جان و مال کا تحفظ ضلعی انتظامیہ کی اولین ترجیح ہے اور تمام متعلقہ اداروں کے ساتھ مکمل رابطہ برقرار رکھتے ہوئے ممکنہ سیلابی صورتحال سے نمٹنے کے لیے ہر ممکن حفاظتی اقدامات کیے جا رہے ہیں۔
اجلاس کے اختتام پر ڈائریکٹر جنرل پی ڈی ایم اے اور ڈپٹی کمشنر جہلم نے متعلقہ محکموں کو ہدایت کی کہ فلڈ ریلیف کیمپس، ریسکیو وسائل، امدادی سامان اور ہنگامی مشینری ہر وقت تیار رکھی جائے، جبکہ نالہ گہان، نالہ بنہاں اور دیگر نشیبی علاقوں کی مسلسل مانیٹرنگ کے ذریعے کسی بھی ہنگامی صورتحال کا بروقت اور مؤثر انداز میں مقابلہ کیا جائے۔
