پی ڈی ایم اے کا مون سون بارشوں سے متعلق الرٹ جاری

پروونشیل ڈیزاسٹر مینجمنٹ اتھارٹی پنجاب (پی ڈی ایم اے) نے مون سون بارشوں سے متعلق الرٹ جاری کر دیا۔ صوبے بھر کی انتظامیہ کو مون سون بارشوں سے متعلق مراسلہ جاری کر دیا۔

پروونشیل ڈیزاسٹر مینجمنٹ اتھارٹی پنجاب نے یکم جولائی سے جہلم سمیت پنجاب بھر میں مون سون بارشوں کا سلسلہ شروع ہونے کی پیش گوئی کر دی۔

پی ڈی ایم اے نے اپنے جاری کردہ مراسلے میں کہا کہ رواں سال مون سون بارشیں 35 فیصد زیادہ ہونے کے خدشات ہیں، جولائی کے پہلے ہفتے میں 15 سے 50 ملی میٹر بارش کا امکان ہے۔

مراسلے میں کہا گیا کہ جولائی کے دوسرے ہفتے میں 25 سے 35 ملی میٹر بارشیں متوقع ہیں، جولائی کے تیسرے ہفتے بالائی و جنوبی پنجاب میں 15 سے 25 ملی میٹر بارش کا امکان ہے۔ جولائی کے چوتھے ہفتے 50 سے 70 ملی میٹر بارشوں کی پیش گوئی ہے۔

ترجمان پی ڈی ایم اے عرفان علی کاٹھیا کا کہنا تھا کہ بالائی، وسطی اور جنوبی پنجاب میں گرج چمک کے ساتھ بارشیں متوقع ہیں۔ وزیراعلیٰ پنجاب مریم نواز کی ہدایت پر متعلقہ محکموں کو الرٹ کر دیا۔

عرفان علی کاٹھیا نے کہا کہ ضلعی انتظامیہ مون سون بارشوں سے قبل حفاظتی اقدامات کو یقینی بنائے، ندی نالوں کی صفائی، نکاسی آب کے انتظامات جلد مکمل کیے جائیں، شہریوں کی جان و مال کا تحفظ اولین ترجیح، کوتاہی کی گنجائش نہیں۔