یوٹیلٹی اسٹورز کارپوریشن کے 3 ہزار سے زائد کنٹریکٹ ملازمین کو نوکریوں سے نکال دیا گیا
جہلم: حکومت پاکستان کی جانب سے یوٹیلیٹی اسٹورز کارپوریشن کے ملک بھر میں 3 ہزار سے زائد عارضی ملازمین کو نوکریوں سے فارغ کر دیا گیا۔
ذرائع کے مطابق یہ اقدام کارپوریشن کو درپیش مالی خسارے اور مسلسل نقصان میں جانے والے اسٹورز کو بند کرنے کی پالیسی کے تحت اٹھایا گیا ہے۔ یوٹیلیٹی اسٹورز کی بندش کے فیصلے کے تحت ان اسٹورز کو بند کیا جا رہا ہے جو طویل عرصے سے خسارے میں چل رہے تھے۔ اس پالیسی کے نتیجے میں بڑی تعداد میں عارضی ملازمین متاثر ہوئے ہیں۔
رواں سال فروری میں بھی تین ہزار کے قریب ملازمین کو نوکریوں سے برطرف کیا گیا تھا، جن میں زیادہ تر ڈیلی ویجز پر کام کرنے والے ورکرز شامل تھے۔ یہ وہ کارکن تھے جو گزشتہ 10 سال سے یوٹیلیٹی اسٹورز کارپوریشن کے تحت مختلف خدمات انجام دے رہے تھے۔
ذرائع کے مطابق ملازمین کو برطرف کرنے کے احکامات چھٹی کے دن جاری کیے گئے، جس پر ملازمین نے شدید افسوس اور مایوسی کا اظہار کیا۔ ان کا کہنا ہے کہ بغیر پیشگی اطلاع کے روزگار سے محروم کر دینا سراسر ناانصافی ہے۔
یاد رہے کہ 22 جنوری کو وفاقی کابینہ کی جانب سے یوٹیلیٹی اسٹورز کارپوریشن کے آپریشنز کو مرحلہ وار بند کرنے کے لیے ایک خصوصی کمیٹی تشکیل دی گئی تھی، جو اس فیصلے کی روشنی میں مختلف اقدامات اٹھا رہی ہے۔
یوٹیلیٹی اسٹورز پر عوام کو سستی اشیاء کی فراہمی کا تصور اب کمزور پڑتا دکھائی دے رہا ہے جبکہ ملازمین کی برطرفی کے بعد ہزاروں خاندانوں کے معاشی حالات مزید بگڑنے کا خدشہ ہے۔
