ڈیول کیرج وے منصوبہ ترجیحات میں شامل ہے، ضلع جہلم کو پنجاب کا مثالی ضلع بنائیں گے، بلال اظہر کیانی

جہلم: بلال اظہر کیانی نے کہا کہ ضلع بھر کے مسائل کو حل کرنا میری اولین ترجیح ہے۔ ضلع جہلم میرا گھر ہے، ڈیول کیرج وے چیلنج سے کم نہیں، یہ منصوبہ بھی میری ترجیحات میں شامل ہے ۔ ضلع بھر کے مسائل کو حل کرنے کے لیے جہلم بیٹھوں گا، ضلع جہلم کو پنجاب کا مثالی ضلع بنائیں گے۔

ان خیالات کا اظہار پاکستان مسلم لیگ ن کے مرکزی رہنما ء ممبر قومی اسمبلی حلقہ این اے 60بلال اظہر کیانی نے پاکستان مسلم لیگ ن کے ضلعی رہنماء راجہ تصور ایوب کے بھائی راجہ کامران ایوب کی دعوت ولیمہ کے موقع پر نجی میرج ہال میں جہلم پریس کلب الیکٹرانک میڈیا کے صدر چوہدری عابد محمود، چیئرمین الیکٹرانک میڈیا عامر کیانی، سینئر صحافی شہزاد علی راجہ اور شہریار علی راجہ سمیت سینئر صحافیوں سے غیر رسمی گفتگو کرتے ہوئے کیا۔

انہوں نے کہا کہ ضلع جہلم میرا آبائی ضلع ہے اور ضلع جہلم کے مسائل سے بخوبی آگاہ ہوں۔ جہلم تا للَہ 128کلو میٹر سڑک اکھاڑنے کی قطا کوئی ضرورت نہیں تھی، کام کرنے والی کمپنی نے 128کلو میٹر سڑک اکھاڑ کر گڑوںمیں تبدیل کر دی جس کی وجہ سے آج تحصیل جہلم اور تحصیل پنڈدانخان کے عوام کو مسائل کا سامنا کرنا پڑرہا ہے۔

بلال اظہر کیانی نے کہا کہ اگر یہ منصوبہ پنجاب حکومت کے پاس ہوتا تو یہ سڑک اپنے مقررہ وقت سے قبل تعمیر ہو چکی ہوتی۔ ضلع جہلم کو پنجاب کا مثالی ضلع بنانے میں کوئی کسر نہیں چھوڑیں گے۔ پاکستان مسلم لیگ ن کو بے شمار مسائل ورثے میں ملے ، مسلم لیگ ن کی قیادت نے جس طرح ملک کی بھاگ دوڑ سنبھالی کسی سے ڈھکی چھپی بات نہیں۔

انہوں نے کہا کہ پاکستان مسلم لیگ ن کے قائد میاں محمد نواز شریف اور وزیر اعلی پنجاب مریم نواز شریف نے بجلی صارفین کی مشکلات کو مدنظر رکھتے ہوئے اربوں روپے کے فنڈز وفاق کو دینے کا فیصلہ کیا جو کہ بجلی کے صارفین کے لیے بہت بڑا پیکج ہے۔

بلال اظہر کیانی نے کہا کہ اسلام آباد کے ساتھ ساتھ اب ضلع جہلم میں بھی مرکزی مسلم لیگ ن کے دفتر کو وقت دیا کروں گا تاکہ تعمیر و ترقی کے کاموں کے ساتھ ساتھ عوامی مسائل کو بھی حل کیا جائے اور ضلع جہلم پنجاب کا مثالی ضلع ہو۔ ضلع کے تمام اداروں پر میری گہری نظر ہے ،جن میں بہتری لانے کے لیے مزید کام کرنے کی اشد ضرورت ہے۔ خود علاقہ میں جا کر لوگوں کے مسائل حل کروں گا، جہلم کے لوگوں کے لیے میرے دروازے ہر وقت کھلے ہیں۔

دعوت ولیمہ میں ضلع بھر کی سیاسی، سماجی، کاروباری، مذہبی اور صحافتی تنظیموں کے عمائدین سمیت تمام مکاتب فکر سے تعلق رکھنے والے شہریوں کی کثیر تعداد موجود تھی۔ اس موقع پر شہریوں نے شادی کے بندھن میں بندھنے والے راجہ کامران ایوب اور بڑے بھائی کو شادی کی مبارک باد پیش کی اور نیک خواہشات کا اظہار کیا۔