پڑی درویزہ؛ آئیسکو سب ڈویژن خانپور میں غیر اعلانیہ لوڈشیڈنگ کی انتہا، صارفین پریشان

پڑی درویزہ: آئیسکو سب ڈویژن خانپور کے زیر انتظام علاقوں میں 27 اور 28 جون کو غیر اعلانیہ لوڈشیڈنگ کا سلسلہ شدید ہوگیا۔

صارفین نے شکایت کی ہے کہ نماز جمعہ کے وقت بھی بجلی بند رہی اور رات گئے تک بجلی کی غیر حاضری نے شہریوں کو شدید مشکلات سے دوچار کر دیا۔ شدید گرمی اور حبس کے عالم میں بجلی کی بار بار بندش سے گھریلو اور کاروباری سرگرمیاں متاثر ہوئیں۔

27 جون دوپہر 12 بجے کے بعد بجلی بند ہوگئی جو نماز جمعہ کے دوران بھی معطل رہی اور کچھ دیر کے بعد بحال ہوئی، مگر شام سے رات 12 بجے تک وقفے وقفے سے لوڈشیڈنگ جاری رہی۔ اسی طرح 28 جون کی صبح 10 بجے سے دوبارہ بجلی کی ترسیل بند ہونا شروع ہوئی۔

میڈیا کی جانب سے وضاحت طلب کیے جانے پر ایس ڈی او آئیسکو سب ڈویژن خانپور چکوال حمزہ شاہد نے کہا کہ تیز بارش اور درجہ حرارت میں غیر معمولی تبدیلیوں کے باعث بجلی کی طلب و رسد متاثر ہوتی ہے، جس کے نتیجے میں بعض اوقات غیر اعلانیہ لوڈشیڈنگ کرنا مجبوری بن جاتی ہے۔

انہوں نے مزید وضاحت کرتے ہوئے کہا کہ 27 جون کی رات کو گرڈ اسٹیشن سے فورس لوڈشیڈنگ کی گئی، جبکہ 28 جون کو بارش کی وجہ سے متعدد ٹرانسفارمرز میں فنی خرابی پیدا ہوئی، جن کی تبدیلی کے سبب بجلی کی معطلی ہوئی۔

ایس ڈی او حمزہ شاہد نے عوام سے تعاون کی اپیل کرتے ہوئے کہا کہ آئیسکو انتظامیہ بجلی کی مسلسل فراہمی کے لیے ہر ممکن اقدامات کر رہی ہے، اور ایسی صورتحال سے نمٹنے کے لیے فیلڈ ٹیمیں الرٹ رہتی ہیں۔

عوامی حلقوں نے آئیسکو سے مطالبہ کیا ہے کہ بجلی کی بندش سے متعلق بروقت آگاہی دی جائے تاکہ شہری غیر یقینی صورتحال سے بچ سکیں اور اپنے معمولات کو بہتر طریقے سے ترتیب دے سکیں۔