دینہ: منشیات کیس میں ایک اور مجرم کو جرم ثابت ہونے پر 16 سال قید اور جرمانے کی سزا سنا دی گئی۔
تفصیلات کے مطابق جہلم کی عدالت نے منشیات کے مقدمہ نمبر 467/24 بجرم CNSA 9(i)3E تھانہ دینہ کا فیصلہ سنا دیا۔ عدالت نے سال 2024 میں منشیات فروشی کے جرم میں ملوث ملزم صداقت خان کے خلاف جرم ثابت ہونے پر اسے 16 سال قید اور 5 لاکھ روپے جرمانے کی سزا سنائی۔
ترجمان جہلم پولیس کے مطابق جہلم پولیس نے پیشہ ورانہ مہارت کا مظاہرہ کرتے ہوئے ملزم کو ٹریس کر کے گرفتار کیا، ٹھوس شواہد کے ساتھ مکمل چالان عدالت میں پیش کیا اور مقدمہ کی مؤثر پیروی کی، جس کے نتیجے میں معزز عدالت نے مجرم کو قرار واقعی سزا سنائی۔
اس موقع پر طارق عزیز سندھو نے کہا کہ منشیات فروش معاشرے کا ناسور ہیں، جن کے مکمل خاتمے کے لیے جہلم پولیس کا بھرپور آپریشن جاری رہے گا۔ انہوں نے مقدمہ کی کامیاب پیروی پر پولیس کی انویسٹیگیشن اور لیگل ٹیموں کو شاباش دیتے ہوئے تعریفی سرٹیفکیٹس اور نقد انعامات دینے کا بھی اعلان کیا۔
ڈی پی او جہلم کا مزید کہنا تھا کہ نوجوان نسل کو منشیات کی لعنت سے بچانے کے لیے منشیات فروشوں کے خلاف بلاامتیاز اور سخت کارروائیاں جاری رکھی جائیں گی۔
-
-
-
-
