جہلم میں غیر معیاری چاکلیٹس، ٹافیاں اور پاپڑ کی کھلم کھلا فروخت، بچوں کی صحت شدید خطرے میں
16
جہلم: ضلع بھر میں غیر معیاری چاکلیٹس، ٹافیاں اور پاپڑ وسیع پیمانے پر فروخت کیے جا رہے ہیں، جن کے استعمال سے معصوم بچوں کی صحت بری طرح متاثر ہو رہی ہے۔ شہریوں نے اس صورتحال پر شدید تشویش کا اظہار کرتے ہوئے متعلقہ اداروں کی خاموشی پر سوالات اٹھا دیے ہیں۔
شہریوں کے مطابق ضلع بھر کی مارکیٹوں، دکانوں اور تعلیمی اداروں کے اطراف میں مختلف ملٹی نیشنل کمپنیوں کے معروف برانڈز سے ملتے جلتے ناموں اور پیکنگ کے تحت غیر معیاری اشیائے خوردونوش سرِعام فروخت ہو رہی ہیں۔ ان میں خاص طور پر بچوں کے استعمال کی اشیاء شامل ہیں، جن میں ٹافیاں، چاکلیٹس اور رنگ برنگی پیکنگ میں پاپڑ نمایاں ہیں۔
عوام کا کہنا ہے کہ مارکیٹ میں غیر معیاری ٹافیوں کی بھرمار ہے، جن کی تیاری میں ناقص اور مضر صحت اجزاء استعمال کیے جاتے ہیں۔ چونکہ ان اشیاء کی فروخت پر منافع معمول سے کہیں زیادہ ہوتا ہے، اس لیے متعدد دکاندار بچوں کی صحت کو نظر انداز کرتے ہوئے انہیں فروخت کرنے کو ترجیح دے رہے ہیں۔ اسی طرح مختلف ناموں اور دلکش پیکنگ میں غیر معیاری چاکلیٹس بھی دستیاب ہیں، جو بظاہر مہنگے برانڈز جیسی دکھائی دیتی ہیں مگر معیار اور صحت کے اصولوں سے یکسر عاری ہوتی ہیں۔
شہریوں نے مزید بتایا کہ پاپڑ کی مختلف اقسام بھی خوشنما رنگوں اور دل لبھانے والی پیکنگ میں فروخت کی جا رہی ہیں، جن کی تیاری میں حفظانِ صحت کے اصولوں کو قطعی طور پر مدنظر نہیں رکھا جاتا۔ ان اشیاء میں استعمال ہونے والے کیمیکل رنگ اور غیر معیاری اجزاء بچوں کے معدے، دانتوں اور مجموعی صحت کے لیے انتہائی نقصان دہ ثابت ہو رہے ہیں۔
عوامی و سماجی حلقوں نے مطالبہ کیا ہے کہ پنجاب فوڈ اتھارٹی اور ضلعی انتظامیہ فوری طور پر اس سنگین مسئلے کا نوٹس لے، غیر معیاری اور مضر صحت اشیاء بنانے اور فروخت کرنے والوں کے خلاف سخت کارروائی عمل میں لائی جائے اور مارکیٹوں میں مؤثر چیکنگ کا نظام قائم کیا جائے۔ شہریوں کا کہنا ہے کہ معصوم بچوں کی صحت کے ساتھ کسی بھی قسم کا کھلواڑ ناقابلِ برداشت ہے اور اس سلسلے میں غفلت برتنے والوں کو قانون کے کٹہرے میں لایا جانا چاہیے۔
