جہلم میں حکومتی احکامات کے بعد ماسک کی قیمتوں میں اضافہ

جہلم شہر اور اسکے گردونواح میں دکانداروں نے حکومتی احکامات کے بعد ماسک کی قیمتوں میں اضافہ کر دیا، پنجاب حکومت کی طرف سے سموگ کے باعث طلباء و طالبات اورشہریوں کیلئے ماسک پہنانا لازمی قرار دیا گیا ہے۔

ماسک پہننا لازمی ہونے کی وجہ سے میڈیکل سٹورز مالکان اوردکانداروں نے بھی ماسک کی قیمتوں میں اضافہ کرتے ہوئے دس روپے میں فروخت ہونےوالا ماسک 20 روپے اور 100 روپے والا ماسک 150 روپے میں فروخت کرنا شروع کر دیا ہے۔ طلباء و طالبات اور شہری ماسک پہنا لازمی ہونے کی وجہ سے دوکانداروں سے مہنگے داموں ماسک خریدنے پر مجبور ہیں۔

طلباء و طالبات اور شہریوں کا کہنا ہے کہ پہلے یہی ماسک دس روپے میں فروخت کیاجارہا تھا،حکومتی احکامات کے بعد میڈیکل سٹور مالکان اور دوکانداروں نے ماسک کی قیمتوں میں خود ساختہ اضافہ کر دیا ہے۔ اگر حکومت کوئی چیز شہریوں کیلئے لازمی قرار دیتی ہے تواگلے ہی روز اس کی قیمتوں میں اضافہ کردیا جاتا ہے۔ اگر حکومت قیمتوں کو کنٹرول نہیں کر سکتی تو کسی بھی چیز کو شہریوں پر لازمی قرار نہیں دینا چاہیے۔

شہریوں نے اعلیٰ حکام سے نوٹس لینے کا مطالبہ کیا ہے۔