ہیٹ سٹروک سے بچاؤ کے لیے پانی کا زیادہ استعمال کریں، ڈاکٹر فواد مجید چوہدری

جہلم: شدید گرمی اور بڑھتے ہوئے درجہ حرارت کے پیش نظر ڈسٹرکٹ ہیڈکوارٹر اسپتال جہلم کے معروف میڈیکل اسپیشلسٹ ڈاکٹر فواد مجید چوہدری نے شہریوں کو ہیٹ سٹروک اور گرمی سے پیدا ہونے والی بیماریوں سے محفوظ رہنے کے لیے احتیاطی تدابیر اختیار کرنے کی ہدایت کی ہے۔

اپنے ایک بیان میں ڈاکٹر فواد مجید چوہدری نے کہا کہ موسم گرما کی شدت میں جسم میں پانی کی کمی مختلف طبی مسائل اور خطرناک پیچیدگیوں کا سبب بن سکتی ہے، اس لیے شہری زیادہ سے زیادہ پانی، تازہ جوسز اور دیگر صحت بخش مشروبات کا استعمال یقینی بنائیں تاکہ جسم میں پانی کی مقدار متوازن رہے۔

انہوں نے کہا کہ بلا ضرورت دھوپ میں نکلنے سے گریز کیا جائے، خصوصاً دوپہر کے اوقات میں جب سورج کی تپش اپنے عروج پر ہوتی ہے۔ اگر کسی مجبوری کے تحت باہر جانا ضروری ہو تو سر کو ٹوپی، کپڑے یا چھتری سے ڈھانپ کر رکھا جائے اور ہلکے رنگوں کے سوتی کپڑے استعمال کیے جائیں۔

ڈاکٹر فواد مجید چوہدری نے مزید کہا کہ بچوں، بزرگوں اور مختلف بیماریوں میں مبتلا افراد کو خصوصی احتیاط کی ضرورت ہے کیونکہ یہ افراد شدید گرمی اور ہیٹ سٹروک سے زیادہ متاثر ہو سکتے ہیں۔ انہوں نے والدین اور اہل خانہ کو مشورہ دیا کہ وہ ایسے افراد کی صحت پر خصوصی نظر رکھیں اور انہیں زیادہ دیر تک دھوپ میں نہ رہنے دیں۔

انہوں نے بتایا کہ ہیٹ سٹروک کی علامات میں شدید پیاس، چکر آنا، سر درد، جسمانی کمزوری، بے ہوشی، متلی اور جسمانی درجہ حرارت میں غیر معمولی اضافہ شامل ہو سکتے ہیں۔ ایسی علامات ظاہر ہونے کی صورت میں متاثرہ شخص کو فوری طور پر ٹھنڈی اور سایہ دار جگہ منتقل کیا جائے، پانی پلایا جائے اور فوری طبی امداد حاصل کی جائے۔

ڈاکٹر فواد مجید چوہدری نے شہریوں پر زور دیا کہ گرمی کے موجودہ موسم میں احتیاطی تدابیر پر عمل کر کے نہ صرف اپنی بلکہ اپنے اہل خانہ کی صحت کا بھی تحفظ یقینی بنائیں۔ انہوں نے کہا کہ بروقت احتیاط اور مناسب احتیاطی اقدامات ہیٹ سٹروک جیسے خطرناک طبی مسئلے سے بچاؤ کا مؤثر ذریعہ ہیں۔

انہوں نے عوام سے اپیل کی کہ شدید گرمی کے دوران اپنی روزمرہ سرگرمیوں میں احتیاط برتیں، پانی کا زیادہ استعمال کریں اور صحت کے حوالے سے کسی بھی غیر معمولی علامت کی صورت میں فوری طور پر مستند ڈاکٹر سے رجوع کریں۔