جہلم میں جعلی نمبر پلیٹ استعمال کرنے والا ملزم چند منٹوں میں گرفتار

جہلم پولیس اور سیف سٹی نے مشترکہ کارروائی کرتے ہوئے جعلی نمبر پلیٹ استعمال کرنے والے ملزم کو چند منٹوں میں گرفتار کر لیا۔

تفصیلات کے مطابق جہلم پولیس اور سیف سٹی کے اشتراک سے ایک کامیاب کارروائی کے دوران جعلی نمبر پلیٹ استعمال کرنے والے ملزم کو چند ہی منٹوں میں گرفتار کر لیا گیا جبکہ موٹر سائیکل کو قبضہ پولیس میں لے لیا گیا۔

ترجمان جہلم پولیس کے مطابق سیف سٹی جہلم نے جدید ٹیکنالوجی اور مؤثر نگرانی کے ذریعے جعلی نمبر پلیٹ والی موٹر سائیکل کی نشاندہی کی۔ الرٹ موصول ہوتے ہی کنٹرول روم کے ذریعے فوری طور پر ایلیٹ فورس کو اطلاع دی گئی۔

ایلیٹ فورس کی ٹیم نے بروقت کارروائی کرتے ہوئے جدید مانیٹرنگ سسٹم اور مؤثر کمیونیکیشن کے ذریعے صرف 5 منٹ کے اندر موٹر سائیکل کو ٹریس کر کے ملزم کو گرفتار کر لیا۔

پولیس نے موٹر سائیکل کو قبضہ میں لے کر مزید قانونی کارروائی کا آغاز کر دیا ہے۔

ڈی پی او جہلم شفیق احمد چوہدری کا کہنا ہے کہ بغیر نمبر پلیٹ اور جعلی نمبر پلیٹ استعمال کرنے والوں کے خلاف کریک ڈاؤن جاری رہے گا اور قانون کی خلاف ورزی کرنے والوں کے ساتھ آہنی ہاتھوں سے نمٹا جائے گا۔