جہلم پولیس کا منشیات فروشوں کے خلاف کریک ڈاؤن، دو ملزمان آئس اور شراب سمیت گرفتار

جہلم پولیس کی منشیات فروش عناصر کے خلاف بھرپور کارروائیاں جاری، دو ملزمان کو آئس اور شراب سمیت گرفتار کر لیا گیا۔

تفصیلات کے مطابق جہلم میں تھانہ سول لائنز پولیس نے دو مختلف کارروائیوں میں آئس اور شراب کی بھاری مقدار برآمد کرتے ہوئے دو ملزمان کو گرفتار کر لیا۔ کارروائی ایس ایچ او تھانہ سول لائنز اور ان کی ٹیم نے خفیہ اطلاع پر کی۔ گرفتار ہونے والے ملزمان کی شناخت خبیر حمید عرف عمیری اور احتشام اشفاق کے ناموں سے ہوئی ہے۔

پولیس کے مطابق ملزم خبیر حمید کے قبضے سے 1 کلو 80 گرام آئس برآمد کی گئی جبکہ ملزم احتشام اشفاق سے 10 لیٹر شراب برآمد ہوئی۔

دونوں ملزمان کے خلاف تھانہ سول لائنز میں الگ الگ مقدمات درج کر لیے گئے ہیں اور مزید تفتیش جاری ہے تاکہ یہ معلوم کیا جا سکے کہ ملزمان کسی بڑے منشیات فروش گروہ سے منسلک ہیں یا مقامی سطح پر منشیات کی فروخت میں ملوث تھے۔

پولیس حکام نے واضح کیا ہے کہ منشیات جیسے معاشرتی ناسور کے خاتمے کے لیے زیرو ٹالرنس پالیسی پر عمل کیا جا رہا ہے اور ایسے عناصر کے ساتھ سختی سے نمٹا جائے گا۔