خاتون کو تشدد کا نشانہ بنانے والے شوہر سمیت 2 ملزمان گرفتار

جہلم پولیس نے ایمرجنسی 15 پر موصول ہونے والی کال پر فوری کارروائی کرتے ہوئے خاتون کو مبینہ طور پر تشدد کا نشانہ بنانے والے شوہر اور اس کے بھائی سمیت 2 ملزمان کو گرفتار کر لیا۔

ترجمان جہلم پولیس کے مطابق تھانہ سول لائنز پولیس کو ایمرجنسی 15 پر اطلاع موصول ہوئی کہ ایک شخص اپنے بھائی کے ہمراہ اپنی بیوی کو تشدد کا نشانہ بنا رہا ہے۔ اطلاع ملتے ہی پولیس ٹیم فوری طور پر موقع پر پہنچی اور متاثرہ خاتون کو بحفاظت بازیاب کرا لیا۔

پولیس نے کارروائی کرتے ہوئے خاتون پر تشدد کے الزام میں دونوں ملزمان کو گرفتار کرلیا، جبکہ واقعے کا مقدمہ درج کرکے مزید قانونی کارروائی شروع کر دی گئی ہے۔

ڈی پی او جہلم شفیق احمد چوہدری نے کہا کہ خواتین اور شہریوں پر تشدد کسی صورت برداشت نہیں کیا جائے گا اور ایمرجنسی 15 پر موصول ہونے والی کالز پر فوری رسپانس یقینی بنایا جا رہا ہے۔

انہوں نے کہا کہ شہریوں کی جان و مال اور عزت و آبرو کا تحفظ جہلم پولیس کی اولین ترجیح ہے اور قانون ہاتھ میں لینے والے عناصر کے خلاف بلاامتیاز کارروائی جاری رکھی جائے گی۔