پنڈدادنخان میں سی سی ڈی اور ڈاکوؤں کے درمیان مبینہ مقابلہ، دو خطرناک ملزمان ہلاک

پنڈدادنخان میں سی سی ڈی اور ڈاکوؤں کے درمیان مبینہ مقابلے میں دو خطرناک ڈاکو مارے گئے۔ ہلاک ملزمان کے ساتھی فرار ہو گئے۔

تفصیلات کے مطابق جہلم کی تحصیل پنڈدادنخان کے قریب سی ڈی ڈی ٹیم اور مسلح ڈاکوؤں کے درمیان مبینہ مقابلہ ہوا جس کے نتیجے میں دو خطرناک ملزمان سعید خان اور رحیم خان ہلاک ہو گئے۔

ترجمان سی سی ڈی جہلم کے مطابق دونوں ملزمان کو زخمی حالت میں تحصیل ہیڈ کوارٹر اسپتال پنڈدادنخان منتقل کیا گیا لیکن وہ زخموں کی تاب نہ لاتے ہوئے جاں بحق ہو گئے۔

ترجمان کا کہنا ہے کہ گولپور پل پر دوران ناکہ بندی دو مشکوک گاڑیوں کو رکنے کا اشارہ کیا گیا تو کار سوار ملزمان نے فائرنگ شروع کر دی۔ سی سی ڈی ٹیم کی جوابی کارروائی اور تعاقب پر تھوڑے فاصلے پر دو ملزمان زخمی حالت میں پکڑے گئے جنہیں تحصیل ہیڈکوارٹر اسپتال پنڈدادنخان منتقل کیا گیا تاہم وہ زخموں کی تاب نہ لاتے ہوئے دم توڑ گئے۔

ترجمان کا کہنا ہے کہ سعید خان اور رحیم خان اپنے ہی ساتھیوں کی فائرنگ سے زخمی ہوئے تھے۔ واقعے کے بعد دیگر ملزمان اپنی گاڑیاں چھوڑ کر جنگل کی طرف فرار ہو گئے، جن کی تلاش کے لیے سرچ آپریشن جاری ہے۔

ہلاک ہونے والے دونوں ملزمان کا تعلق پشاور سے بتایا جا رہا ہے جبکہ وہ قتل، اقدام قتل، ڈکیتی اور کار لفٹنگ جیسے سنگین مقدمات میں ریکارڈ یافتہ تھے۔ ملزمان سے اسلحہ اور چھینی گئی کاریں برآمد ہوئی ہیں۔