شدید گرمی میں میٹھے اور ٹھنڈے تربوز شہریوں کے لیے نعمت بن گئے

جہلم: شدید گرمی کی لہر کے دوران میٹھے، ٹھنڈے اور رس بھرے تربوز شہریوں کے لیے راحت اور فرحت کا باعث بن گئے ہیں، جبکہ شہر بھر میں جگہ جگہ لال سرخ تربوزوں سے سجی دکانیں شہریوں کی توجہ کا مرکز بنی ہوئی ہیں۔

موسم گرما کی شدت میں اضافے کے ساتھ ہی تربوز کی مانگ میں بھی نمایاں اضافہ دیکھنے میں آ رہا ہے۔ ابتدائی دنوں میں دکانداروں کی جانب سے تربوز من مانے نرخوں پر فروخت کیے جا رہے تھے، تاہم اب قیمتوں میں واضح کمی آنے کے بعد بہترین اور میٹھا تربوز 200 سے 300 روپے تک آسانی سے دستیاب ہے، جس سے شہریوں نے سکھ کا سانس لیا ہے۔

ماہرینِ صحت کے مطابق تربوز نہ صرف گرمی کا بہترین توڑ ہے بلکہ انسانی صحت کے لیے بھی بے شمار فوائد رکھتا ہے۔

ماہرین کا کہنا ہے کہ تربوز جسم میں پانی کی کمی پوری کرنے، معدے کو ٹھنڈک پہنچانے اور بلڈ پریشر کو متوازن رکھنے میں مددگار ثابت ہوتا ہے، جبکہ جلد کو تروتازہ رکھنے میں بھی اہم کردار ادا کرتا ہے۔

انہوں نے بتایا کہ تربوز میں موجود وٹامن اے، وٹامن سی اور اینٹی آکسیڈنٹس جسمانی توانائی میں اضافہ کرتے ہیں اور گرمی کے مضر اثرات سے بچانے میں معاون ثابت ہوتے ہیں۔

شہریوں کا کہنا ہے کہ شدید گرمی کے موسم میں ٹھنڈا اور میٹھا تربوز نہ صرف تازگی اور سکون فراہم کرتا ہے بلکہ مناسب قیمت کے باعث اب یہ ہر طبقے کی پہنچ میں بھی آ چکا ہے۔