خصوصی افراد کو سرکاری سہولیات تک آسان رسائی اور حقوق کا تحفظ یقینی بنایا جائے گا، میر رضا اوزگن

جہلم: ضلع میں خصوصی افراد کو درپیش مسائل کے ازالے، ان کے حقوق کے تحفظ، بحالی کی سہولیات اور سرکاری خدمات تک آسان رسائی کا جائزہ لینے کے لیے ڈسٹرکٹ ویلفیئر اینڈ ری ہیبلیٹیشن یونٹ کا اجلاس ڈپٹی کمشنر جہلم میر رضا اوزگن کی زیرِ صدارت منعقد ہوا۔

اجلاس میں متعلقہ محکموں کے افسران اور ڈسٹرکٹ ویلفیئر اینڈ ری ہیبلیٹیشن یونٹ کے نمائندگان نے شرکت کی۔ اس موقع پر خصوصی افراد کی جانب سے پیش کیے گئے مسائل، مختلف درخواستوں، دستیاب فلاحی و بحالی سہولیات، سرکاری خدمات تک رسائی اور مسائل کے حل کے لیے جاری اقدامات کے حوالے سے تفصیلی بریفنگ دی گئی۔

ڈپٹی کمشنر نے متعلقہ افسران سے مختلف امور پر تفصیلات دریافت کیں اور خصوصی افراد کو درپیش مسائل کے حل کے لیے کیے جانے والے اقدامات کا جائزہ لیا۔

میر رضا اوزگن نے ہدایت کی کہ خصوصی افراد کے مسائل کے ازالے کے لیے مؤثر اور عملی اقدامات کیے جائیں اور ان کی درخواستوں پر ترجیحی بنیادوں پر کارروائی یقینی بنائی جائے۔

انہوں نے کہا کہ خصوصی افراد کی فلاح و بہبود، بحالی، سرکاری سہولیات تک آسان رسائی اور ان کے حقوق کے تحفظ کے لیے تمام متعلقہ محکمے باہمی رابطہ کاری کو موثر بنائیں۔ انہوں نے متعلقہ افسران کو ان اقدامات کی مسلسل نگرانی یقینی بنانے کی بھی ہدایت کی تاکہ خصوصی افراد کو سرکاری خدمات کے حصول میں غیر ضروری مشکلات کا سامنا نہ کرنا پڑے۔