جہلم میں منشیات کیس میں جرم ثابت ہونے پر منشیات فروش کو 9 سال قید کی سزا

جہلم میں منشیات کیس میں جرم ثابت ہونے پر منشیات فروش کو 9 سال قید اور جرمانے کی سزا سنا دی گئی۔

تفصیلات کے مطابق منشیات فروشی کے مقدمے میں جرم ثابت ہونے پر عدالت نے مجرم زنیر علی کو 9 سال قید اور 80 ہزار روپے جرمانے کی سزا سنادی۔ مقدمہ نمبر 471/24 بجرم CNSA 9(1)3C تھانہ سول لائنز کا فیصلہ معزز عدالت نے سنایا۔

ملزم زنیر علی کو سال 2024 میں منشیات فروشی کے الزام میں جہلم پولیس نے کامیاب کارروائی کے دوران گرفتار کیا تھا۔ پولیس نے ملزم کے خلاف ٹھوس شواہد کے ساتھ چالان مرتب کیا اور مقدمے کی مؤثر پیروی کی گئی، جس کے نتیجے میں عدالت نے ملزم کو جرم ثابت ہونے پر سزا سنائی۔

ڈی پی او جہلم طارق عزیز سندھو نے اس موقع پر اپنے بیان میں کہا کہ منشیات فروش معاشرے کا ناسور ہیں اور ان کے خلاف جہلم پولیس کا کریک ڈاؤن بھرپور انداز میں جاری ہے۔ انہوں نے مقدمے کی کامیاب پیروی پر انوسٹی گیشن ٹیم اور لیگل ٹیم کو شاباش دی اور تعریفی سرٹیفکیٹس کے ساتھ نقد انعام دینے کا بھی اعلان کیا۔

ڈی پی او کا کہنا تھا کہ منشیات کی لعنت کے خاتمے کے لیے جہلم پولیس پرعزم ہے اور قانون کی عملداری یقینی بنائی جائے گی۔