منشیات کیس کا فیصلہ، جرم ثابت ہونے پر مجرم کو 10 سال قید اور جرمانے کی سزا

سوہاوہ: عدالت نے تھانہ سوہاوہ میں درج منشیات کے مقدمے کا فیصلہ سناتے ہوئے جرم ثابت ہونے پر مجرم شمریز شہزاد کو 10 سال قید اور ایک لاکھ 25 ہزار روپے جرمانے کی سزا سنا دی۔

ترجمان جہلم پولیس کے مطابق تھانہ سوہاوہ میں منشیات سے متعلق مقدمہ نمبر 424/25 بجرم CNSA 9(1)6C درج کیا گیا تھا۔ پولیس کے مطابق شمریز شہزاد نے سال 2025 میں منشیات سے متعلق جرم کا ارتکاب کیا تھا، جس کے بعد پولیس نے جدید تفتیشی اور تکنیکی ذرائع کی مدد سے اسے ٹریس کرکے گرفتار کیا۔

پولیس ترجمان کا کہنا ہے کہ مقدمے کی تفتیش مکمل کرنے کے بعد دستیاب شواہد کی بنیاد پر چالان عدالت میں پیش کیا گیا، جبکہ عدالتی کارروائی کے دوران جہلم پولیس کی جانب سے مقدمے کی پیروی کی گئی۔

پولیس کے مطابق مقدمے میں پیش کیے گئے شواہد اور عدالتی کارروائی مکمل ہونے کے بعد عدالت نے شمریز شہزاد کو مجرم قرار دیتے ہوئے 10 سال قید اور ایک لاکھ 25 ہزار روپے جرمانے کی سزا سنائی۔

ڈی پی او جہلم شفیق احمد چوہدری نے عدالتی فیصلے کے حوالے سے کہا کہ منشیات فروش معاشرے کے لیے سنگین خطرہ ہیں اور ان کے خلاف بھرپور کریک ڈاؤن جاری ہے۔ انہوں نے کہا کہ منشیات کے مقدمات میں مؤثر تفتیش اور شواہد کی بنیاد پر قانونی کارروائی کا سلسلہ جاری رکھا جائے گا۔