انجمن آرائیاں تحصیل جہلم کے زیر اہتمام عید ملن پارٹی کا انعقاد، معززین کی شرکت

جہلم: انجمن آرائیاں تحصیل جہلم کے زیر اہتمام ایک نجی میرج ہال میں عید ملن پارٹی کی شاندار تقریب کا انعقاد کیا گیا، جس میں آرائیں برادری کے معززین، سیاسی، سماجی، کاروباری، قانونی اور صحافتی شخصیات نے بھرپور شرکت کی۔

تقریب میں شرکاء کی بڑی تعداد نے شرکت کی جبکہ میزبانی کے فرائض شہر کی معروف سماجی و کاروباری شخصیت چوہدری محمد ولید آرائیں نے نہایت خوش اسلوبی سے انجام دیے۔

تقریب میں انجمن آرائیاں ضلع جہلم کے سرپرستِ اعلیٰ اور معروف قانون دان چوہدری محمد یعقوب آرائیں، سرپرست چوہدری علی اصغر، ضلعی صدر حاجی حبیب الرحمٰن چوہدری، میڈیا کوآرڈینیٹر چوہدری مہربان حسین اور تحصیل پنڈدادنخان کی معروف سیاسی و کاروباری شخصیت چوہدری اسماعیل جوتانہ کی آمد پر شرکاء نے پُرجوش استقبال کیا۔ اس موقع پر پھولوں کی پتیاں نچھاور کی گئیں جبکہ پاک فوج اور آرائیں برادری کے حق میں فلک شگاف نعرے بھی لگائے گئے۔

تقریب کا باقاعدہ آغاز تلاوتِ کلامِ پاک سے ہوا جس کی سعادت قاری محسن نے حاصل کی، جبکہ الطاف علی نے میاں محمد بخش اور عارف کھڑی کا کلام پیش کرکے محفل کو روحانی رنگ بخشا۔

مقررین نے اپنے خطابات میں آرائیں برادری کے اتحاد، فلاح و بہبود، نوجوان نسل کی تعلیم و تربیت اور معاشی استحکام کے لیے مشترکہ جدوجہد کی ضرورت پر زور دیا۔ اس موقع پر سابق صدر انجمن آرائیاں اور معروف قانون دان چوہدری محمد یعقوب آرائیں کی سماجی اور فلاحی خدمات کو بھی زبردست خراجِ تحسین پیش کیا گیا۔

ضلعی صدر انجمن آرائیاں حاجی حبیب الرحمن چوہدری نے خطاب کرتے ہوئے کہا کہ انجمن آرائیاں کا منشور صرف دعوؤں تک محدود نہیں بلکہ عملی خدمت پر مبنی ہے۔ نوجوانوں کو باعزت روزگار کی فراہمی، مستحق بچیوں کی شادیوں میں معاونت، کاروباری رہنمائی اور ضرورت مند خاندانوں کی کفالت جیسے منصوبے انجمن کی اولین ترجیحات میں شامل ہیں۔

انہوں نے اعلان کیا کہ بزرگوں کی خدمت اور دیکھ بھال کے لیے جدید سہولیات سے آراستہ اولڈ ہوم جلد تعمیر کیا جائے گا، جس کے اخراجات انجمن کی سرکردہ شخصیات اپنی جیب سے برداشت کریں گی۔ اس موقع پر انہوں نے سٹی صدر کے حوالے جدید کمپیوٹرائزڈ آکسیجن مشین بھی کی تاکہ برادری کے بیمار افراد کو علاج کی بنیادی سہولت ان کی دہلیز پر فراہم کی جا سکے۔

حاجی حبیب الرحمٰن چوہدری نے مزید کہا کہ نوجوانوں کو مصنوعی ذہانت (AI)، کمپیوٹر اور جدید ٹیکنالوجی کی تعلیم سے آراستہ کیا جائے گا تاکہ وہ اپنے ہنر اور صلاحیتوں کے ذریعے باعزت روزگار حاصل کر سکیں اور معاشرے کی ترقی میں کردار ادا کریں۔

معروف قانون دان چوہدری زاہد یعقوب نے اپنے خطاب میں کہا کہ قوموں کی ترقی کا راز تعلیم، شعور اور اتحاد میں پوشیدہ ہے۔ اگر برادری اجتماعی مفاد کو ذاتی مفاد پر ترجیح دے تو کوئی طاقت اس کی ترقی کی راہ میں رکاوٹ نہیں بن سکتی۔ انہوں نے نوجوان نسل پر زور دیا کہ وہ جدید علوم کے ساتھ ساتھ کردار، دیانت داری اور اخلاقیات کو بھی اپنی پہچان بنائیں۔

معروف قانون دان چوہدری کاشف اسلام نے کہا کہ معاشروں کی اصل طاقت ان کی باصلاحیت نوجوان نسل ہوتی ہے۔ انجمن آرائیاں کی جانب سے نوجوانوں کو جدید تعلیم، ٹیکنالوجی اور ہنر سے جوڑنے کا عزم انتہائی قابلِ تحسین ہے۔ انہوں نے اتحاد، برداشت اور خدمتِ خلق کے جذبے کو فروغ دینے کی ضرورت پر زور دیا۔

تحصیل پنڈدادنخان کی معروف سیاسی و کاروباری شخصیت چوہدری اسماعیل جوتانہ نے اپنے خطاب میں کہا کہ برادریوں کی اصل عظمت بڑے اجتماعات میں نہیں بلکہ اپنے کمزور، نادار اور ضرورت مند افراد کا سہارا بننے میں ہے۔ انہوں نے کہا کہ انجمن آرائیاں نوجوانوں کے مستقبل، بزرگوں کی کفالت اور دکھی انسانیت کی خدمت کے لیے جو اقدامات کر رہی ہے وہ قابلِ تقلید مثال ہیں۔

تقریب کے اختتام پر چوہدری محمد قذافی کے کزن کی جلد صحت یابی کے لیے خصوصی اجتماعی دعا کی گئی۔ شرکاء نے اس عزم کا اعادہ کیا کہ انجمن آرائیاں کو خدمتِ خلق، بھائی چارے، اتحاد اور فلاحِ انسانیت کی ایک مضبوط اور فعال تنظیم بنانے کے لیے اپنی کوششیں جاری رکھیں گے۔