جلالپور شریف میں خاتون سے مبینہ زیادتی کرنے والا ملزم گرفتار
پنڈدادنخان کے علاقے جلالپور شریف میں خاتون کو مبینہ جنسی زیادتی کا نشانہ بنانے والے ملزم کو پولیس نے گرفتار کر لیا۔
ترجمان جہلم پولیس کے مطابق تھانہ جلالپور شریف کے ایس ایچ او اور ان کی ٹیم نے کارروائی کرتے ہوئے خاتون کو مبینہ طور پر جنسی زیادتی کا نشانہ بنانے والے ملزم کو گرفتار کر لیا ہے، جبکہ واقعے کا مقدمہ درج کرکے ملزم سے مزید تفتیش جاری ہے۔
پولیس ترجمان کے مطابق ملزم کو گرفتار کرنے کے بعد واقعے کے حوالے سے تفتیش کا دائرہ کار مزید وسیع کیا جا رہا ہے اور شواہد اکٹھے کیے جا رہے ہیں۔
پولیس حکام کا کہنا ہے کہ ملزم کے خلاف ٹھوس شواہد اکٹھے کرکے چالان عدالت میں پیش کیا جائے گا تاکہ قانون کے مطابق اسے قرار واقعی سزا دلوائی جا سکے۔
اس موقع پر ڈی پی او جہلم شفیق احمد چوہدری نے کہا کہ جنسی زیادتی جیسے سنگین جرائم میں ملوث ملزمان کے خلاف بلاامتیاز قانونی کارروائی عمل میں لائی جائے گی اور متاثرہ افراد کو انصاف کی فراہمی یقینی بنائی جائے گی۔ انہوں نے کہا کہ ایسے مقدمات میں قانون کے مطابق تمام ضروری کارروائی مکمل کی جائے گی۔
