جہلم میں ٹریکٹر ٹرالی الٹنے سے 29 سالہ نوجوان ڈرائیور موقع پر جاں بحق

جہلم کے نواحی علاقے دھریالہ میں ایک دلخراش حادثے میں 29 سالہ نوجوان ٹریکٹر ڈرائیور موقع پر جاں بحق ہو گیا۔

ریسکیو 1122 ذرائع کے مطابق اینٹوں سے بھری ہوئی بھاری ٹرالی ٹریکٹر کے ساتھ حادثے کا شکار ہو گئی، جس کے نتیجے میں ٹریکٹر ڈرائیور موقع پر ہی دم توڑ گیا۔

حادثہ جہلم کے تھانہ چوٹالہ کے نواحی گاؤں باٹیاں نالہ کے قریب پیش آیا، جہاں 29 سالہ محمد رضوان ولد محمد اکبر سکنہ پننوال ٹریکٹر ٹرالی پر لدی اینٹیں ایک اونچی جگہ پر اتارنے کی کوشش کر رہا تھا۔ ٹرالی کا وزن زیادہ ہونے کی وجہ سے ٹریکٹر اچانک سامنے سے اٹھ گیا اور محمد رضوان اسٹیئرنگ اور ٹرالی کے درمیان بری طرح پھنس گیا۔

حادثے کے وقت رضوان کا ایک ساتھی بھی موجود تھا جو معجزانہ طور پر محفوظ رہا۔ ریسکیو 1122 کی ٹیم نے بروقت پہنچ کر لاش کو نکالا اور ضابطے کی کارروائی کے بعد ڈی ایچ کیو اسپتال جہلم منتقل کر دیا۔