اگلے 45 دن حکومت کے لئے بہت اہم ہیں، فواد چوہدری

دینہ/ جہلم: سابق وفاقی وزیر فواد چوہدری نے مخصوص نشستوں سے متعلق کیس کا فیصلہ آنے کے بعد حکومت کیلیے اگلے 45 دن اہم قرار دے دیے۔

فواد چوہدری نے اپنے ویڈیو بیان میں کہا کہ حکومتی وزرا پریشان ہیں کہ پی ٹی آئی پارٹی نہیں تو اسے سیٹیں کیسے دی گئیں، اٹارنی جنرل وزیر قانون کو نہ تو درست بریف کر سکے نہ عدالتی کارروائی سنی، پچھلی 4 سماعتوں کے دوران مدعا ہی یہی رہا کہ سیٹیں کس کو ملنی ہیں۔

انہوں نے کہا کہ مخصوص نشستیں پی ٹی آئی کو ملنی چاہیے یہ 5-8 کا نہیں بلکہ 2-11 کا فیصلہ ہے، فیصلے میں 11 ججز نے الیکشن کمیشن کو چارج شیٹ کیا ہے، الیکشن کمیشن نے سارا الیکشن پراسس ہی مشکوک کر دیا ہے، عدالتی فیصلے کے بعد مطالبہ زور پکڑ رہا ہے کہ چیف الیکشن کمشنر مستعفی ہوں۔

ویڈیو بیان میں فواد چوہدری نے کہا کہ اب سب کی نظریں چیف جسٹس لاہور ہائی کورت عالیہ نیلم پر ہیں، دیکھنا ہوگا کہ الیکشن ٹریبونل کے 4 ججز تبدیل ہوتے ہیں یا نہیں، الیکشن ٹربیونلز کے 4 ججز کو نہ ہٹایا گیا تو اگلی سماعتیں معمول کے مطابق ہوں گی۔

انہوں نے یہ بھی کہا کہ معمول کے مطابق کارروائی آگے بڑھنے سے حکومت 45 دنوں میں اکثریت کھو دے گی، قومی اسمبلی میں پی ٹی آئی کے نمبرز بڑھ کر 115 ہو چکے ہیں۔

ان کا کہنا تھا کہ قومی اسمبلی میں اکثریت حاصل کرنے کیلئے پی ٹی آئی کو 30 سے 35 سیٹیں درکار ہیں، قومی اسمبلی میں اپوزیشن کی 30 سے 35 نشستیں موجود ہیں، اگلے 45 دن حکومت کیلئے اہم ہیں۔

عدت کیس فیصلہ: فواد چوہدری کی تمام خواتین کو مبارکباد

عدت کیس فیصلے پر فواد چوہدری کا پیغام سامنے آگیا۔ فواد چوہدری نے تمام خواتین کو مبارکباد دی ۔

فواد چوہدری نے کہا کہ میں عدت کیس کے فیصلے پر تمام خواتین کو مبارکباد دیتا ہوں کیونکہ یہ صرف بشری بی بی کا نہیں پاکستان کی ہر عورت کا معاملہ تھا۔ بدترین کیس کے انجام کو پہنچنے پر مبارک باد دیتا ہوں۔

فواد چوہدری نے کہا کہ اس کیس سے خواتین کے حقوق کو خطرات لاحق ہو گئے تھے ، حکومت کا سیاسی مقاصد کیلئے اسلامک قوانین کا استعمال قابل مذمت ہے عدالت کا آج کا فیصلہ انصاف کی فتح ہے۔