تحصیل روڈ کی نئی مارکیٹ میں مبینہ ناقص تعمیرات پر شہریوں کا اظہار تشویش
جہلم شہر کے اندرون علاقے تحصیل روڈ پر حال ہی میں تعمیر ہونے والی مارکیٹ کے بارے میں بعض دکانداروں اور شہریوں نے تعمیراتی معیار پر تحفظات کا اظہار کرتے ہوئے متعلقہ حکام سے شفاف تحقیقات کرانے کا مطالبہ کیا ہے۔
شہریوں اور دکانداروں کے مطابق حالیہ بارشوں کے دوران مارکیٹ کی بعض چھتوں سے پانی ٹپکنے کی شکایات سامنے آئیں جبکہ ان کا دعویٰ ہے کہ زیرِ زمین بجلی کی تاروں میں شارٹ سرکٹ کے خدشے کے پیش نظر حفاظتی اقدام کے طور پر متعدد دکانوں کے بجلی کنکشن عارضی طور پر منقطع کیے گئے۔
بعض شہریوں نے یہ الزام بھی عائد کیا کہ مارکیٹ میں نئے شٹروں کے بجائے پرانے شٹر نصب کیے گئے ہیں، جس کے باعث تعمیراتی معیار کے حوالے سے سوالات جنم لے رہے ہیں۔ ان کا کہنا ہے کہ اگر ان الزامات میں صداقت پائی گئی تو اس سے قومی خزانے کو نقصان پہنچنے کا معاملہ بھی سامنے آ سکتا ہے۔
شہریوں، تاجروں اور مختلف سماجی و فلاحی تنظیموں کے نمائندوں نے وزیراعلیٰ پنجاب مریم نواز شریف سے مطالبہ کیا ہے کہ ضلع بھر میں جاری ترقیاتی منصوبوں، بالخصوص مذکورہ مارکیٹ کی تعمیر، کا شفاف اور غیرجانبدارانہ آڈٹ اور انکوائری کرائی جائے، ذمہ دار افراد کا تعین کیا جائے اور اگر کسی قسم کی مالی یا انتظامی بے ضابطگی ثابت ہو تو قانون کے مطابق سخت کارروائی عمل میں لائی جائے تاکہ عوامی وسائل کے تحفظ اور ترقیاتی منصوبوں میں شفافیت کو یقینی بنایا جا سکے۔
