ضلع جہلم میں جشن آزادی کی تیاریاں عروج پر، بازاروں میں سبز ہلالی پرچموں کی بہار

جہلم شہرسمیت ضلع بھر میں77 واں جشن آزادی پاکستان منانے کے لئے دکانوں اور مارکیٹوں ، سرکاری ونیم سرکاری دفتروں ، عمارتوں، بڑے بڑے پلازوں کو سبز ہلالی پر چموں اور برقی قمقموں سے سجا یا جارہا ہے۔

ماہ اگست شروع ہوتے ہی شہرکے گلی محلوں ، بازاروں دکانوں اور سٹالز پر سبز ہلالی پرچم فروخت ہونا شروع ہو جاتے ہیں، شہری خصوصی طور پر بچے اپنی اپنی پسند کے یوم آزادی کے حوالے سے تیار کئے گئے ملبوسات خریدنے میں مصروف دکھائی دیتے ہیں۔

سبز ہلالی پرچم ، جھنڈیاں ، بچوں کے ملبوسات اور بیجز کی خریداری عروج پر پہنچ چکی ہے. گلی، محلوں، بازاروں میں قومی پر چموں، جھنڈیوں سٹیکروں اور بیجز کی فروخت بھی جاری ہے، شہر کے چھوٹے بڑے بازاروں میں خریداروں کا رش دکھائی دیتا ہے۔ شہریوں کے مطابق جشن آزادی ہم روایتی جوش و خروش سے منائیں گے، اس دن ہمارا پیارا ملک پاکستان آزاد ہوا۔ جس کی آزادی کے لئے بہت سی قربانیاں دینا پڑیں۔

جہلم شہر کے مختلف بازاروں میں قائم سٹالز ہولڈر نے مہنگائی کے حساب سے پرچموں، بینروں، بیجیز اور اسٹیکروں کی قیمتوں میں اضافہ کر رکھا ہے لیکن اس کے باوجود شہر سمیت ملحقہ علاقوں میں خریداروں کا رش دکھائی دیتا ہے۔

جشن آزادی منانے کے لئے ہر شہری کا جوش و ولولہ دیدنی ہے، آزادی پاکستان ہر سال کی طرح اس سال بھی شایان شان طریقے سے منایا جائے گا جس کے لئے تیاریاں آخری مراحل میں داخل ہو چکی ہیں۔