جہلم میں بغیر ترپال ٹریکٹر ٹرالیوں نے شہریوں کی زندگی اجیرن بنا دی
جہلم میں بغیر ترپال اور بغیر ڈھانپے ریت، بجری، مٹی، خاکہ اور بھوسہ لے جانے والی ٹریکٹر ٹرالیوں نے شہریوں اور تاجروں کے لیے شدید مشکلات پیدا کر دی ہیں۔ شہری حلقوں نے اس صورتحال کو سنگین عوامی اور ماحولیاتی خطرہ قرار دیتے ہوئے متعلقہ حکام سے فوری کارروائی کا مطالبہ کیا ہے۔
تفصیلات کے مطابق جہلم میں دن کے اوقات میں اندرون شہر داخل ہونے والی متعدد ٹریکٹر ٹرالیاں بغیر ترپال تعمیراتی میٹریل لے کر سڑکوں پر رواں دواں رہتی ہیں، جس کے باعث فضا میں دھول مٹی کے بادل چھا جاتے ہیں۔ شہریوں کا کہنا ہے کہ اس عمل سے نہ صرف ماحولیاتی آلودگی اور سموگ میں اضافہ ہو رہا ہے بلکہ بازاروں، رہائشی علاقوں اور سڑکوں کے اطراف موجود دکاندار اور مکین بھی شدید متاثر ہو رہے ہیں۔
تاجروں نے شکایت کرتے ہوئے کہا کہ ٹرالیوں سے اڑنے والی گرد و غبار دکانوں میں موجود اشیاء کو نقصان پہنچا رہی ہے جبکہ شہری آنکھوں کی بیماریوں، سانس، الرجی اور دمے جیسے امراض میں مبتلا ہو رہے ہیں۔ دوسری جانب موٹر سائیکل سواروں کا کہنا ہے کہ گرد و غبار کے باعث حدِ نگاہ متاثر ہوتی ہے، جس سے ٹریفک حادثات کا خطرہ بھی بڑھ گیا ہے۔
شہریوں نے سوال اٹھایا کہ ٹریفک پولیس عام شہریوں کے خلاف تو کارروائیاں کرتی ہے مگر ٹریفک قوانین کی کھلم کھلا خلاف ورزی کرنے والی ٹریکٹر ٹرالیوں کے خلاف مؤثر ایکشن کیوں نہیں لیا جاتا۔
عوامی حلقوں نے مطالبہ کیا ہے کہ بغیر ترپال میٹریل لے جانے والی گاڑیوں کے خلاف سخت کارروائی کی جائے اور دن کے اوقات میں ایسی ٹرالیوں کے شہر میں داخلے پر پابندی عائد کی جائے تاکہ شہریوں کو گرد، آلودگی اور بیماریوں سے نجات مل سکے۔
شہریوں نے ڈی پی او جہلم شفیق احمد چوہدری اور متعلقہ اداروں سے فوری نوٹس لینے اور اس دیرینہ مسئلے کے مستقل حل کے لیے مؤثر اقدامات کرنے کی اپیل کی ہے۔
