جہلم فورم دینہ برانچ کے تحت ہارون افضل کھٹانہ صدر جہلم فورم برطانیہ کے اعزاز میں تقریب کا انعقاد

دینہ: جہلم فورم دینہ برانچ کے تحت ہارون افضل کھٹانہ صدر جہلم فورم (یوکے) کے اعزاز میں تقریب کا انعقاد کیا گیا۔

تفصیلات کے مطابق جہلم فورم برطانیہ کے نومنتخب صدر ہارون افضل کھٹانہ کے دورہ پاکستان کے موقع پر سلیم انور کسانہ آرگنائزنگ کوآرڈینیٹر جہلم فورم دینہ برانچ نے ان کے اعزاز میں ایک تقریب کا انعقاد کیا جس میں جہلم فورم کے عہدیداران، ممبران اور جہلم کی فلاحی تنظیمات کے نمائندوں کی ایک کثیر تعداد نے شرکت کی اور ہارون افضل کھٹانہ کو صدر بننے پر مبارکباد پیش کی۔

تقریب میں ڈاکٹر عصمت جاوید ملک (صدر جہلم فورم ) چوہدری غلام احمد زمرد، بریگیڈیئر تصور حسین، صدر دینہ پریس کلب سید توقیر آصف شاہ، اظہر چوہدری، سید طاہر شاہ، مہر خادم حسین، کرنل نعیم میاں، وسیم بیگ، افتخار مغل، سعدیہ نیلم کیانی، بشری انور، محمد صدیق، میاں مبشر، میاں محمود، چوہدری عنصر ایڈووکیٹ، میاں واجد عظیم، راجہ ساجد نواز، عمران وائیں، عابد بٹ ایڈووکیٹ، انجینئر حاجی صفدر، عابد دھمیال اور چوہدری اعجاز(سابق کونسلر یوکے) نے خصوصی طور پر شرکت کی۔

اس موقع پر تقریب سے خطاب کرتے ہوئے مقررین نے کہا کہ فلاحی تنظیم جہلم فورم ضلع بھر میں فلاحی سرگرمیوں میں مصروف عمل ہے اور 141 پینے کے پانی کے منصوبے مستحق آبادیوں کے لئے مکمل کر چکی ہے۔ صحت کے حوالے سے کسیال میں جہلم فورم کاہسپتال بھی مفت سہولیات فراہم کر رہا ہے۔

انہوں نے کہا کہ نوجوانوں میں مثبت سرگرمیوں کے فروغ کے لیے فٹبال، ہاکی اور کرکٹ کے ٹورنامنٹس کا بھی اہتمام کیا جاتا ہے۔ سپیشل افراد کے لئے سہ ماہی بنیادوں پر ویل چیئرز بھی مہیا کی جاتی ہیں اس کے علاوہ جہلم فورم کی طرف سے مستحق، یتیم بچیوں اور بیوہ خواتین کو شعور ویلفیئر سنٹر مفتیاں دینہ میں مفت ہنر بھی سکھائے جاتے ہیں تاکہ وہ کسی کے آگے ہاتھ پھیلانے کی بجائے باعزت روزگار کما سکیں۔