جہلم: پنجاب حکومت نے اپنی زمین، اپنا گھر ہاؤسنگ اسکیم کے تحت 3 مرلہ رہائشی پلاٹس کے لیے ڈیجیٹل قرعہ اندازی کا آغاز کر دیا ہے۔ مسلم لیگ ن کے قائد میاں نواز شریف اور وزیر اعلیٰ پنجاب مریم نواز نے لاہور میں منعقدہ تقریب میں پروگرام کا باقاعدہ افتتاح کیا۔
تقریب میں میاں نواز شریف نے وزیر اعلیٰ مریم نواز کی درخواست پر بٹن دبا کر "اپنی زمین، اپنا گھر” پروگرام کی ڈیجیٹل قرعہ اندازی کا آغاز کیا۔ پروگرام کے پہلے مرحلے میں پنجاب کے 19 اضلاع کی 23 ہاؤسنگ اسکیموں کے تحت 2 ہزار مستحق افراد کو 3 مرلہ پلاٹس فراہم کیے گئے۔
جہلم میں 730، قصور میں 388، فیصل آباد میں 255، لودھراں میں 219، اوکاڑہ میں 130، لیہ میں 55، بھکر میں 52، ساہیوال میں 33 اور سرگودھا میں 25 افراد پلاٹ کے حقدار قرار پائے۔
وزیر اعلیٰ مریم نواز شریف نے کہا کہ 3 مرلہ پلاٹ حاصل کرنے والوں کو گھر کی تعمیر کے لیے 15 لاکھ روپے تک قرض فراہم کیا جائے گا، جس کی واپسی 9 سال میں صرف 14 ہزار روپے ماہانہ قسط کی صورت میں ہوگی۔
صوبائی وزیر ہاؤسنگ بلال یاسین نے بتایا کہ نادرا فیلڈ اسٹاف کے ذریعے اسکروٹنی، تصدیق اور ڈسٹرکٹ کمیٹیوں کی منظوری کا فول پروف سسٹم اپنایا گیا ہے تاکہ شفافیت اور درستگی کو یقینی بنایا جا سکے۔ پہلے مرحلے میں 1 لاکھ 83 ہزار سے زائد افراد نے رجسٹریشن کرائی، جبکہ 18 ہزار 308 درخواست دہندگان کو قرعہ اندازی کے لیے اہل قرار دیا گیا۔
یہ پروگرام عوام کو ڈیجیٹل نظام کے ذریعے آسان، شفاف اور سستی رہائش فراہم کرنے کے لیے ترتیب دیا گیا ہے۔ درخواست دہندگان آن لائن اپنی درخواست دے سکتے ہیں اور پیشرفت دیکھ سکتے ہیں۔ ڈیجیٹل بیلٹنگ مفت فراہم کی گئی ہے، جس کے لیے کسی اضافی چارج کی ضرورت نہیں۔ پلاٹس پنجاب ہاؤسنگ اینڈ ٹاؤن پلاننگ ایجنسی کے تحت منظم رہائشی زونز میں فراہم کیے جائیں گے تاکہ محفوظ ملکیت، واضح دستاویزات اور شفاف الاٹمنٹ کو یقینی بنایا جا سکے۔
-
-
-
-
