جہلم: ڈی جی پنجاب فوڈ اتھارٹی کی ہدایت اور ڈپٹی کمشنر جہلم میر رضا اوزگن کی زیر نگرانی پنجاب فوڈ اتھارٹی کی فوڈ سیفٹی ٹیموں نے ضلع بھر میں فوڈ سیفٹی قوانین پر عملدرآمد یقینی بنانے کے لیے بھرپور کارروائیاں کیں۔
اس مہم کے دوران شہریوں کو معیاری اور محفوظ خوراک کی فراہمی کے مقصد کے تحت مجموعی طور پر 73 فوڈ پوائنٹس کا تفصیلی معائنہ کیا گیا۔
چیکنگ کے دوران صفائی کے ناقص انتظامات اور حفظانِ صحت کے اصولوں کی خلاف ورزی پر 12 ہوٹلوں، بیکری یونٹس، ہسپتالوں کی کینٹینز اور میٹ شاپس پر مجموعی طور پر ایک لاکھ ستر ہزار روپے جرمانہ عائد کیا گیا۔ اس کے علاوہ 30 فوڈ بزنس آپریٹرز کو اصلاحی نوٹسز جاری کیے گئے تاکہ وہ مقررہ معیار کے مطابق اپنے انتظامات بہتر بنا سکیں۔
حکام نے واضح کیا کہ خوراک کے معیار اور عوامی صحت پر کسی قسم کا سمجھوتہ ہرگز برداشت نہیں کیا جائے گا۔
پنجاب فوڈ اتھارٹی کے حکام کے مطابق ڈی جی پنجاب فوڈ اتھارٹی کی ہدایات کی روشنی میں ملاوٹ مافیا اور غیر معیاری خوراک فراہم کرنے والوں کے خلاف گھیرا مزید تنگ کیا جا رہا ہے۔
ڈپٹی کمشنر جہلم میر رضا اوزگن نے ہدایت کی ہے کہ صفائی کے ناقص انتظامات رکھنے والے فوڈ پوائنٹس کے خلاف بلاامتیاز کارروائیاں جاری رکھی جائیں، جبکہ فوڈ سیفٹی ٹیمیں روزانہ کی بنیاد پر ضلع کی تمام تحصیلوں میں سرگرمِ عمل رہیں گی تاکہ شہریوں کی صحت کا مؤثر تحفظ یقینی بنایا جا سکے۔
-
-
-
-
