بحریہ فاؤنڈیشن سکول اینڈ کالج دینہ میں سالانہ تقریب تقسیم اسناد کا انعقاد

دینہ: بحریہ فاؤنڈیشن سکول اینڈ کالج دینہ میں سالانہ تقریبِ تقسیمِ اسناد تعلیمی سال 2024-25 نہایت شایانِ شان اور پروقار انداز میں منعقد کی گئی۔

تقریب میں دینہ، جہلم اور گردونواح سے تعلق رکھنے والی معروف علمی، سماجی اور صحافتی شخصیات کے ساتھ ساتھ والدین اور طلبہ کی بڑی تعداد نے شرکت کی۔ تقریب کا آغاز تلاوتِ قرآن پاک سے کیا گیا، جس کے بعد قومی ترانہ بجایا گیا اور حاضرین نے ادب سے کھڑے ہو کر اس کا احترام کیا۔

اس پُروقار موقع پر تعلیمی سرگرمیوں کے ساتھ ساتھ مختلف ٹیبلو، تقاریر، ثقافتی اور ادبی خاکے بھی پیش کیے گئے، جن میں فلسطین کی موجودہ صورتحال، تعلیم کی اہمیت اور معاشرتی شعور کو اجاگر کیا گیا۔ بچوں کی عمدہ پرفارمنس نے شرکاء کے دل جیت لیے اور والدین نے خاکوں کو بے حد سراہا۔

تقریب کے دوران نمایاں کارکردگی دکھانے والے طلباء و طالبات میں میڈلز، اسناد، سرٹیفکیٹس اور شیلڈز تقسیم کی گئیں۔ اس تقریب کو کامیاب بنانے میں کوآرڈینیٹر میڈم وجیہہ مختار اور ان کی ٹیم نے شب و روز محنت کر کے ایک نئی مثال قائم کی، جسے شرکاء نے بحریہ فاؤنڈیشن کالج دینہ کی تاریخ کی یادگار تقریب قرار دیا۔

تقریب میں صدر آل پاکستان پرائیویٹ اسکولز ایسوسی ایشن جہلم پروفیسر شریف ساجد، نائب صدر محمد اشرف اقبال، جنرل سیکرٹری چوہدری تاثیر محمود، ڈائریکٹر کانکورڈیا کالج دینہ ایم شہزاد، پرنسپل کانکورڈیا ایم کلیم اللہ صدیق، اور دیگر صحافی و سماجی شخصیات نے خصوصی شرکت کی۔

تقریب کے اختتام پر ملکی سلامتی، ترقی اور استحکام کے لیے دعا کی گئی اور حاضرین نے ادب و احترام کے ساتھ قومی ترانہ سنا، جس نے محفل کو ایک ولولہ انگیز اختتام بخشا۔