ڈسٹرکٹ پبلک سکول جہلم میں بچوں کے لیے نئی سہولت کا اضافہ، ای سی ایل روم کا افتتاح
جہلم: بچوں کے لیے سیکھنے، کھیل اور مثبت تفریح کے بہتر مواقع فراہم کرنے کے لیے اسسٹنٹ کمشنر جہلم عبداللہ غازی خان نے چیف ایگزیکٹو آفیسر ایجوکیشن ڈاکٹر نازیہ شہزادی، ڈپٹی ڈائریکٹر سوشل ویلفیئر علیم یوسف اور جنرل سیکرٹری نور ویلفیئر سوسائٹی ایڈووکیٹ فرحت کمال ضیاء کے ہمراہ ڈسٹرکٹ پبلک سکول جہلم کا دورہ کیا۔ سکول آمد پر پرنسپل حمیرا راجہ اور بچوں نے مہمانوں کا پرتپاک استقبال کیا۔
دورے کے دوران بچوں کے لیے خصوصی طور پر قائم کیے گئے نئے ای سی ایل روم کا باقاعدہ افتتاح کیا گیا۔ اس موقع پر سکول میں بچوں کے لیے دستیاب سیکھنے، کھیل اور مثبت تفریح کی مختلف سرگرمیوں کا بھی جائزہ لیا گیا اور بچوں کی ذہنی و جسمانی نشوونما کے لیے سازگار ماحول کی اہمیت پر گفتگو کی گئی۔
اس موقع پر جنرل سیکرٹری نور ویلفیئر سوسائٹی ایڈووکیٹ فرحت کمال ضیاء کی جانب سے بچوں کے لیے کھلونے اور مختلف کھیلوں کا سامان فراہم کیا گیا۔ بچوں کے لیے تعلیمی و تفریحی سرگرمیوں میں سہولت فراہم کرنے اور ان کی فلاح و بہبود کے لیے سماجی تعاون کو سراہا گیا۔
دورے کے دوران سکول میں بچوں کے لیے سیکھنے کے عمل کو مزید دلچسپ اور مؤثر بنانے، کھیلوں کی سرگرمیوں کو فروغ دینے اور مثبت تفریح کے مواقع میں اضافہ کرنے کے حوالے سے بھی مختلف امور کا جائزہ لیا گیا۔
بعد ازاں ماحولیاتی بہتری اور شجرکاری کے فروغ کے لیے سکول میں پودے لگائے گئے۔ اس موقع پر پودوں کی مناسب دیکھ بھال اور ان کی حفاظت کی اہمیت پر زور دیتے ہوئے کہا گیا کہ تعلیمی اداروں میں شجرکاری سے نہ صرف ماحول کو بہتر بنانے میں مدد ملتی ہے بلکہ بچوں میں ماحول دوستی اور درختوں کی اہمیت کا شعور بھی اجاگر ہوتا ہے۔
اس موقع پر اس بات پر زور دیا گیا کہ سکول میں بچوں کے لیے صاف، سرسبز، محفوظ اور ذہنی و جسمانی نشوونما کے لیے سازگار ماحول کو مزید بہتر بنایا جائے۔ بچوں کو تعلیم کے ساتھ کھیل، تفریح اور مثبت سرگرمیوں کے مناسب مواقع فراہم کرنے سے ان کی ہمہ جہت صلاحیتوں کو اجاگر کرنے میں مدد مل سکتی ہے۔
شرکاء نے سکول میں بچوں کی سہولیات اور تعلیمی ماحول کو مزید بہتر بنانے کے لیے باہمی تعاون اور عملی اقدامات جاری رکھنے کی ضرورت پر بھی زور دیا۔
