اسسٹنٹ کمشنر جہلم کا ڈی ایچ کیو ہسپتال کا اچانک دورہ، طبی سہولیات اور ادویات کی فراہمی کا جائزہ لیا

جہلم: میر رضا اوزگن کی ہدایت پر اسسٹنٹ کمشنر جہلم عبد السمیع شیخ نے ڈسٹرکٹ ہیڈ کوارٹر (ڈی ایچ کیو) ہسپتال جہلم کا تفصیلی دورہ کیا۔ دورے کا مقصد مریضوں کو فراہم کی جانے والی طبی سہولیات، ادویات کی دستیابی اور پیرا میڈیکل اسٹاف کی حاضری کا عملی جائزہ لینا تھا۔

دورے کے دوران اسسٹنٹ کمشنر نے ایمرجنسی وارڈ، فارمیسی اور آؤٹ ڈور (او پی ڈی) سمیت مختلف شعبہ جات کا معائنہ کیا۔ انہوں نے زیرِ علاج مریضوں اور ان کے لواحقین سے ملاقات کر کے علاج معالجے، ادویات کی فراہمی اور مجموعی انتظامات سے متعلق معلومات حاصل کیں۔

اس موقع پر انہوں نے ہسپتال انتظامیہ کو ہدایت کی کہ صفائی ستھرائی کے معیار کو مزید بہتر بنایا جائے اور مریضوں کو مفت ادویات کی فراہمی میں کسی قسم کی کوتاہی یا تاخیر برداشت نہیں کی جائے گی۔

اسسٹنٹ کمشنر عبد السمیع شیخ نے واضح کیا کہ ڈپٹی کمشنر جہلم کے ویژن کے مطابق عوام کو علاج معالجے کی بہترین سہولیات فراہم کرنا ضلعی انتظامیہ کی اولین ترجیح ہے۔ انہوں نے دوٹوک انداز میں کہا کہ ڈیوٹی میں غفلت برتنے والے عملے کے خلاف سخت قانونی کارروائی عمل میں لائی جائے گی، کیونکہ سرکاری ہسپتال میں آنے والا ہر شہری بروقت، معیاری اور باعزت علاج کا مکمل حق رکھتا ہے۔