ڈومیلی کے علاقے گوڑہ اسکندر پور کے قریب کار اور موٹر سائیکل میں تصادم، دو افراد شدید زخمی

سوہاوہ کے علاقے گوڑہ اسکندر پور میں دربار کے قریب کار اور موٹر سائیکل کے درمیان تصادم کے نتیجے میں دو افراد شدید زخمی ہو گئے۔

تفصیلات کے مطابق جہلم کی تحصیل سوہاوہ میں ڈومیلی کے علاقے گوڑہ اسکندر پور میں دربار کے قریب سڑک پر کار اور موٹر سائیکل کے درمیان تصادم ہوا، جس کے نتیجے میں موٹر سائیکل پر سوار دونوں افراد شدید زخمی ہو گئے۔ حادثے کی اطلاع ملتے ہی ریسکیو 1122 کی ٹیم فوری طور پر جائے وقوعہ پر پہنچ گئی۔

ریسکیو ذرائع کے مطابق زخمیوں کی شناخت 25 سالہ محمد احمد رضا ولد ارشد محمود اور 32 سالہ وقار یونس ولد یونس کے ناموں سے ہوئی ہے۔

حادثے میں محمد احمد رضا کی دائیں ٹانگ کی فیمر (ران کی ہڈی) ٹوٹ گئی، جبکہ وقار یونس کی دائیں ٹانگ کی ہڈیوں میں کھلا فریکچر (اوپن فریکچر) آیا۔ دونوں زخمیوں کو موقع پر ابتدائی طبی امداد فراہم کرنے کے بعد مزید علاج کے لیے ڈی ایچ کیو ہسپتال جہلم منتقل کر دیا گیا۔

حادثے کے نتیجے میں موٹر سائیکل مکمل طور پر تباہ ہو گیا۔ مقامی ذرائع کے مطابق زخمیوں میں سے ایک کا تعلق گوڑہ اسکندر پور جبکہ دوسرے کا تعلق گاؤں پدھری سے بتایا جا رہا ہے۔