سوہاوہ میں بھائی نے 23 سالہ سگے بھائی کو کیوں قتل کیا؟ ملزم اور اسکے دوست نے اہم انکشافات کر دیے

سوہاوہ کے نواحی علاقہ کھبل اعوان میں بڑے بھائی کو قتل کرنے والے گرفتار ملزم اور اس کے ساتھی نے اہم انکشافات کر دیے۔

تفصیلات کے مطابق 14 اکتوبر کو جہلم کی تحصیل سوہاوہ کے نواحی علاقے کھبل اعوان میں پی ٹی سی ایل کے ملازم 23 سالہ محمد زبیر کو سر پر گولی مار کر قتل کر دیا گیا تھا جس پر قاتل نے اپنے بھائی کے قتل کا مقدمہ نامعلوم افراد کے خلاف درج کروایا جس پر ڈی پی او جہلم کی ہدایت پر ڈی ایس پی سوہاوہ ساجد گوندل نے اپنی سپرویژن میں تفتیش کا آغاز کرایا۔

انسپکٹر عبدالطیف اور ایس ایچ او تھانہ سوہاوہ نے مختلف پہلوؤں سے تفتیش کا آغاز کیا تو مدعی مقدمہ مقتول کا چھوٹا بھائی ذیشان ہی اپنے بڑے بھائی کا قاتل نکلا۔ باپ بن کر گھر چلانے والے بڑے بھائی کو قتل کرنے والے سگے بھائی ذیشان اور اس کے دوست قریبی عزیز عمیر اشرف کو پولیس نے گرفتار کر لیا۔

دوران تفتیش مقتول زبیر کے بھائی ذیشان نے انکشاف کیا کہ اس نے اپنے دوست عمیر اشرف کی ایماء پر بھائی جو آن لائن جواء کھیلنے سے منع کرتا تھا اور دوست عمیر اشرف کو گھر آنے سے روکتا تھا کو انشورنس کی رقم حاصل کرنے کے لیے سر پر فائر مار کر قتل کیا۔

ایس ایچ او تھانہ سوہاوہ نے ملزمان کے قبضہ سے آلہ قتل برآمد کر کے مزید تفتیش شروع کر دی۔

یاد رہے کہ ملزم عمیر اشرف مقتول کا قریبی رشتہ دار ہے جو تھانہ گوجر خان کے زناء بالجبر کے مقدمہ میں اشتہاری ہے۔