جہلم میں 6 سالہ بچی جی ٹی روڈ پر ہائی ایس کی ٹکر سے جاں بحق

جہلم میں 6 سالہ بچی سڑک عبور کرتے ہوئے ہائی ایس سے ٹکرا کر جاں بحق ہو گئی۔

تفصیلات کے مطابق یہ افسوسناک حادثہ جہلم کے علاقے مجاہد آباد میں جی ٹی روڈ پر پیش آیا، جہاں 6 سالہ بچی فاطمہ جی ٹی روڈ کراس کرتے ہوئے ہائی ایس کی زد میں آ کر موقع پر ہی جاں بحق ہو گئی۔

ریسکیو ذرائع کے مطابق یہ حادثہ اس وقت پیش آیا جب بچی سڑک عبور کر رہی تھی اور تیز رفتار ہائی ایس نے اسے ٹکر مار دی۔ حادثے کے نتیجے میں بچی کو سر پر شدید چوٹیں آئیں اور وہ موقع پر ہی جان کی بازی ہار گئی۔

اطلاع ملتے ہی ریسکیو1122 کی ٹیم موقع پر پہنچ گئی اور بچی کی لاش کو ڈسٹرکٹ ہیڈ کوارٹر ہسپتال جہلم منتقل کر دیا۔ جاں بحق ہونے والی 6 سالہ بچی کی شناخت فاطمہ دختر اویس محمود کے نام سے ہوئی اور اس کا تعلق جہلم کے شمالی محلہ سے تھا۔

حادثے کے بعد ہائی ایس کا ڈرائیور گاڑی چھوڑ کر موقع سے فرار ہو گیا جس کی تلاش جاری ہے جبکہ پولیس نے گاڑی کو اپنی تحویل میں لے لیا ہے۔