ڈومیلی اور گردونواح میں غیرقانونی پٹرول ایجنسیوں کی بھرمار، حادثات کا خدشہ

سوہاوہ: ڈومیلی اور گردونواح میں غیرقانونی پٹرول ایجنسیوں کی بھرمار، حفاظتی انتظامات نہ ہونےسے بڑاحادثہ رونماہونے کاخدشہ ہے۔

تفصیلات کے مطابق جہلم کی تحصیل سوہاوہ کے علاقے ڈومیلی اور اس کے مضافات میں جگہ جگہ غیرقانونی پٹرول ایجنسیاں قائم ہیں، جہاں من مانے ریٹس پر پٹرول اور ڈیزل فروخت کیا جا رہا ہے۔ حفاظتی انتظامات نہ ہونے کے باعث کسی بڑے حادثے کا خدشہ ہے جبکہ انتظامیہ خاموش تماشائی بنی ہوئی ہے۔

ان غیرقانونی پٹرول ایجنسیوں کے مالکان عوام کی مجبوری کا فائدہ اٹھاتے ہوئے مہنگے داموں پٹرول اور ڈیزل فروخت کر رہے ہیں۔ حفاظتی اقدامات کی عدم موجودگی سے یہ ایجنسیاں کسی وقت بھی بڑے حادثے کا سبب بن سکتی ہیں۔

عوامی حلقوں نے انتظامیہ کی لاپرواہی پر گہری تشویش کا اظہار کرتے ہوئے ڈپٹی کمشنر جہلم میثم عباس، اسسٹنٹ کمشنر سوہاوہ محمد افضال اور سول ڈیفنس جہلم سے فوری کارروائی اور ان غیرقانونی ایجنسیوں کے خلاف سخت اقدامات کا مطالبہ کیا ہے۔