اسسٹنٹ کمشنر جہلم آفتاب اشرف کا اراضی ریکارڈ سینٹر کا دورہ، سروسز اور کارکردگی کا جائزہ لیا

جہلم: ڈپٹی کمشنر جہلم میر رضا اوزگن کی ہدایات پر اسسٹنٹ کمشنر جہلم آفتاب اشرف نے اراضی ریکارڈ سینٹر کا دورہ کیا، جہاں انہوں نے جاری سروسز، کارکردگی اور عوامی سہولت کے اقدامات کا تفصیلی جائزہ لیا۔

دورے کے دوران یہ مشاہدہ کیا گیا کہ عملہ سرکاری تعطیل کے باوجود فرائض انجام دے رہا تھا اور پلس پروگرام کے تحت اندراجات، کھیوٹ اور کھاتہ انتقال سے متعلق امور کی بروقت تکمیل میں مصروف تھا۔

اسسٹنٹ کمشنر نے موقع پر موجود سائلین سے ملاقات کر کے ان کے مسائل سنے اور فراہم کردہ سہولیات کے معیار کے حوالے سے فیڈبیک حاصل کیا، تاکہ سروس ڈیلیوری کو مزید مؤثر بنایا جا سکے۔

انہوں نے عملے کی پیشہ ورانہ ذمہ داریوں کی ادائیگی کو سراہتے ہوئے ہدایت کی کہ مقررہ اہداف کے حصول کے لیے کام کی رفتار میں مزید بہتری لائی جائے اور عوام کو خدمات کی بلا تعطل فراہمی ہر صورت یقینی بنائی جائے۔